Қараөткелдің тұрғыны қара суға зар болып отыр

Астанадан небәрі он шақырым жерде орналасқан Қараөткел мен Қаражар ауылдарының тұрғындары 21-ғасырда өмір сүріп жатқанына күмәндана бастады, себебі жаз басталғалы бері қарапайым ауыз су қол жетпес арманға айналып, халық шөлден қаталап отыр. Ай сайын коммуналдық төлемдерді уақытылы төлеп отырған көпшілік бір айдан астам уақыт бойы тек құрғақ уәдемен қоректенуге мәжбүр.

Ауылда су беруге арнайы кесте енгізілген, ресми түрде тіршілік нәрі таңғы алтыдан тоғызға дейін, түскі он екіден екіге, ал кешке алтыдан түнгі он екіге дейін ғана берілуі тиіс. Алайда, бұл кестенің өзіне жарымай отырған халықтың жағдайы мүшкіл, тұрғындардың айтуынша, краннан су тамшылап қана ағады, ешқандай қысым жоқ, ал кестеден тыс кезде су мүлдем өшіріліп тасталады. Тұрғындар ауыл чаттарында бұл жағдайды нағыз мазаққа балап, өздерін концлагерьде жүргендей сезінетіндерін, жұмыстан шаршап келгенде не жуына алмай, не тамақ істей алмай отырғандарын ашына жазуда.

Олар бұл жағдайдың жыл сайын қайталанатынын, алдын ала қамдануға толық бір жыл уақыт болса да, жауаптылардың еш шара қолданбағанын айтып налиды. Ең сорақысы, судың жоқтығы аз болғандай, енді жарықтың өшуі жығылғанға жұдырық болып отыр. Кесте бойынша су келген аз ғана уақытты пайдаланып қалуға тырысқан тұрғындар су енді қосылды-ау деп кір жуғыш машинаны қосқанда жарықтың сөніп қалатынын, сөйтіп тіпті кірлерін де жуа алмай масқара болғандарын айтып мұңын шағуда.

Бұл көз жасы мен мұң-мұқтаж маусым айының тоғызы күні «Жетінші арна» тілшілерінің де назарына ілігіп, эфирден көрсетілген болатын. Сол кезде коммуналдық қызмет өкілдері жаңадан екі ұңғыма қазып, 10-15 күн ішінде су мәселесін толық шешеміз деп халық алдында уәде берген еді. Алайда, берілген мерзім әлдеқашан өтіп кетсе де, халық әлі күнге дейін қара суға зар болып отыр, ал шенеуніктердің сөзі тек бос уәде күйінде қалды.

Бұл ауылдарды сумен қамтуға тікелей жауапты мекеме – Целиноград ауданы әкімдігіне қарасты «Целиноград су арнасы» шаруашылық жүргізу құқығындағы мемлекеттік коммуналдық кәсіпорны. Мемлекеттік кірістер комитетінің ресми порталындағы мәліметтерге сүйенсек, аталмыш кәсіпорын қалыпты жұмыс істеп тұрған, миллиондаған қаржылық айналымы бар мекеме. Салық түсімдері жыл сайын артып келеді, мәселен, мекеме 2021 жылы 81,9 миллион теңге салық төлесе, 2024 жылы бұл көрсеткіш 164,5 миллион теңгеге жеткен, ал 2025 жылы 173,7 миллион теңгеден астам салық төлеген. Тіпті 2026 жылдың есепті кезеңінің өзінде салық түсімдері 108,6 миллион теңгеден асып жығылады. Сонымен қатар, мекеменің айыппұлдарды да миллиондап төлейтінін байқауға болады, тек 2024 жылы 6,2 миллион теңге, ал 2025 жылы 7 миллион теңгеден астам айыппұл төлеген. Қаражат бар, салық төленіп жатыр, халық ай сайынғы судың ақысын қалтқысыз төлеп отыр, сонда ауылды қалыпты тіршілік көзімен қамтамасыз етуге не кедергі деген орынды сұрақ туындайды. Қарапайым халық қашанғы шөлден қаталап, құрғақ уәдемен тамақтанып, су келгенде жарықсыз отыра бермек деген мәселе әлі де өзекті күйінде қалып отыр.