Жасанды интеллект жазған әндер плейлисттен алынады

Жақында Spotify жасанды интеллект (ЖИ) арқылы жасалған артистерді арнайы белгілеп, олардың музыкасын оқырмандардың жеке ұсыныстарынан алып тастайтынын мәлімдеді. Қыркүйектің ортасынан бастап күшіне енетін бұл өзгеріс аясында, шынайы адамға тиесілі емес профильдерде «AI Persona» (ЖИ-тұлға) белгісі пайда болады.

Музыкалық стриминг платформасы бүгіннен бастап артистерге өздерінің виртуалды тұлға екенін ашық көрсетуге мүмкіндік береді. Алайда, Spotify тек авторлардың адалдығына ғана сеніп қоймайды. Компания профильдерді, оның ішінде есімдер мен фотореалистикалық суреттерді тексеру үшін адам күші мен ЖИ құралдарын қатар қолданбақ.

Егер сараптама нәтижесінде артист бейнесінің жасанды интеллектпен жасалғанына күдік туындаса, платформа оған «Likely AI Persona» (Ықтимал ЖИ-тұлға) белгісін тағады. Бірінші кезекте тыңдарманы көп, аса танымал профильдер тексеріледі.

Жасанды тректер енді ұсынылмайды ЖИ-тұлғаларға тиесілі музыка автоматты түрде редакторлық топтамалар мен жеке ұсыныстардан (рекомендация) алынып тасталады.

"Тыңдармандар шынайы адамға ұқсайтын профильдің артында жасанды интеллект тұрғанын білгенде, бұған наразы болатындарын анық жеткізді", — дейді Spotify өкілдері. "Біз алгоритмдерімізді нағыз, шынайы артистерді қолдауға бейімдейміз және ұсыныстарымызға сапасыз немесе спам контенттің кіріп кетпеуін қадағалаймыз".

Шешім стримингтік платформаларға жасанды интеллект жасаған музыканың жаппай жүктелуі аясында қабылданып отыр. Мәселен, жақында Deezer сервисі платформаға күнделікті жүктелетін әндердің тең жартысы ЖИ арқылы жасалатынын мәлімдеген болатын.

Spotify жаңа ереженің музыканы жасау тәсіліне емес, тек артистің жеке басына (тұлғасына) қатысты екенін атап өтті. Қазіргі уақытта платформада Deezer сияқты нейро-музыканы дәл анықтайтын жүйе жоқ болса да, авторларға ЖИ қолданғанын көрсетуге рұқсат етіледі. Ал нағыз адамдар үшін «Verified by Spotify» (Spotify растаған) белгісі іске қосылды.

«Ықтимал ЖИ-тұлға» белгісі қойылған жағдайда, артистерге хабарлама жіберіліп, шешімге шағымдану құқығы беріледі. Сонымен қатар, болашақта платформада тыңдармандардың өздері де күдікті ЖИ-профильдерге шағым түсіре алатын арнайы функция пайда болмақ.