Anthropic интернет пен электр қуатынан да үлкен өзгеріс әкелмек

Claude нейрожелісін әзірлеген Anthropic компаниясы жасанды интеллект әлемдік экономиканы индустрияландыру, электр қуаты мен интернеттің пайда болуынан да бетер түбегейлі өзгертеді деп мәлімдеді. Бұл туралы Reuters агенттігі қолына түскен компанияның IPO (акцияларды бастапқы орналастыру) проспектісінде жазылған.

Қараша айындағы АҚШ-тағы аралық сайлаудан кейін өтеді деп күтіліп отырған IPO кезінде компанияның нарықтық құны 2 триллион доллардан асуы мүмкін. Бұл – мамыр айында жасалған 965 миллиард долларлық ішкі бағалаудан екі есеге көп көрсеткіш. Тамыз айында инвесторлар бұл орналастыру көлемі жағынан маусым айындағы SpaceX IPO-сынан да асып түседі деп болжаған болатын.

Алайда, мұндай ауқымды жоспарларды жүзеге асыру орасан зор қаржыны талап етеді. Құжатқа сәйкес, алдағы жылдары Anthropic-тің бұлтты сервистер, есептеу қуаттылығы және өзге де инфрақұрылым үшін төлейтін міндеттемелері 518 миллиард долларға жетпек.

Миллиардтаған табыс пен рекордтық шығын

Компанияның қаржылық көрсеткіштері қайшылыққа толы. 2025 жылы Anthropic табысы 12 есеге шарықтап, шамамен 4,6 миллиард долларға жеткен. Бірақ табыспен бірге шығын да еселенді: операциялық шығын 2,98 миллиардтан 8,06 миллиард долларға дейін өссе, таза шығын көлемі 42 миллиард долларға жуықтады. Тек есептеу қуаттылығы мен инфрақұрылымға кеткен шығынның өзі бір жылда үш есеге артып, 7,33 миллиард долларды құрады. Бұл компанияның жалпы операциялық шығынының (12,65 млрд доллар) жартысынан көбін алып жатыр.

Тағы бір назар аударарлық қатер: Anthropic табысының қақ ширегін небәрі екі ірі клиент қамтамасыз етіп отыр. Компания мұны үлкен тәуекел деп санайды, өйткені ірі тапсырыс берушілермен ұзақ мерзімді келісімшарттар жоқ, демек олар кез келген уақытта шығындарын қысқартып немесе қызметтен мүлдем бас тарта алады.

Адамзатқа төнетін «экзистенциалды қауіп»

Financial Times басылымының жазуынша, құжаттың үштен бір бөлігі ЖИ дамуымен байланысты қауіп-қатерлерге арналған. Anthropic инвесторларға өз технологияларының адамзат үшін «экзистенциалды қауіп» төндіруі мүмкін екенін ашық ескертті. Компанияның ішкі зерттеулері көрсеткендей, бақылаудағы сынақтар кезінде неғұрлым автономды модельдер күтпеген әрекеттерге барып, бағдарламалық кодты бұзуға, алаяқтыққа көмектесуге және ақпаратты бұрмалауға бейім болған. Оған қоса, жетілдірілген модельдердің адамдарды басқарып, бопсалау қаупі де бар.

Осыған дейін Anthropic басшысы Дарио Амодеи қауіпсіздікке төнетін қатерлерге байланысты ЖИ-дің жаңа мүмкіндіктерін шығаруды бәсеңдетуге шақырған еді. Дегенмен, нарықтағы бәсекелестік өз дегенін істетті: қыркүйекте OpenAI ұсынған GPT-6 Astra моделіне жауап ретінде Anthropic өзінің Opus 5.5 нұсқасын таныстырды.

Алып корпорациялар да бұл бәсекеге белсенді араласып жатыр. Сәуір айында Amazon бұрын салынған 8 миллиард долларға қоса, Anthropic-ке тағы 25 миллиард доллар инвестиция құюға келісті. Өз кезегінде, Anthropic алдағы он жылда Amazon Web Services қызметтеріне 100 миллиард доллардан астам қаржы жұмсап, 5 ГВт-қа дейін есептеу қуаттылығын алуға міндеттелді.

Пентагонмен қақтығыс

2026 жылы Anthropic АҚШ билігімен Claude нейрожелісін әскери мақсатта қолдану шарттарына байланысты үлкен қақтығысқа барды. Компания өз технологияларын жаппай бақылау мен адам қатысуынсыз жұмыс істейтін автономды қару-жарақ үшін пайдалануға қатаң тыйым салуды талап етті. Бұған жауап ретінде Пентагон Anthropic-ті «жеткізу тізбегіне қауіп төндіреді» деп танып, қыркүйектің соңына дейін оның технологияларынан толықтай бас тартатынын ресми мәлімдеді.