Елімізде әлемдік деңгейдегі микрохирургия мектебі ашылды
Қытайлық делегация мен танымал профессорлар не үшін келді? Қазақстандағы жаңа медицина мектебінің ашылуынан шолу мен ерекше мәліметтер
Қазақстанда медицина саласындағы тарихи жаңалық орын алды: 9 қыркүйекте Н.Ж.Батпенов атындағы Ұлттық ғылыми травматология және ортопедия орталығының базасында елімізде тұңғыш рет Yasargil микрохирургия және микронейрохирургия мектебі ресми түрде ашылды.
Бұл жаңа оқу ордасы еліміздегі травматолог-ортопедтер, қол хирургтері, нейрохирургтер мен жас мамандардың кәсіби біліктілігін арттыратын бірегей практикалық алаңға айналмақ. Мектептің негізгі мақсаты – ұсақ қан тамырлары мен жүйкелерді қалпына келтіру, зақымданған тіндерді реконструкциялау және ауыр жарақаттардан кейін науқастардың аяқ-қолын сақтап қалу секілді аса күрделі операциялық әдістерді отандық мармандарға тереңдетіп үйрету.
Мектептің ашылу салтанатына Қытайдан арнайы делегация келіп, орталық басшылығымен бірге лента қию рәсіміне қатысты. Атап айтқанда, Қытайдың Zhengzhou Renji Hospital директоры Хоу Цзяньси (Hou Jianxi) арнайы дәріс оқып, халықаралық тәжірибе мен заманауи тәсілдер туралы кәсіби пікір алмасты. Сонымен қатар тараптар бірлескен күрделі клиникалық жағдайларды талқылап, пациентті емдеу тактикасын қарастырды және жаңа медициналық жабдықтардың мүмкіндіктерін практиада сынақтан өткізді.
Бұл бастама жол-көлік немесе өндірістік жарақаттар салдарынан зақым алған азаматтарға көрсетілетін жоғары технологиялық медициналық көмектің сапасын жаңа деңгейге көтеруге бағытталған. Айта кетейік, жаңа мектептің ашылуы 10–11 қыркүйек күндері өтетін XIII халықаралық ғылыми-практикалық конференция қарсаңында ұйымдастырылып отыр.
Пікірлер
Әзірге пікір жоқ. Алғашқы пікірді қалдырыңыз!
