Медаль дауы мәресіне жетті: Қырғызстан Қазақстанның жеңісін мойындады

Қырғызстанда өткен VI Дүниежүзілік көшпенділер ойындарының медальдық есебіне қатысты туындаған дау нүктесіне жетті. Ұйымдастырушылар техникалық қатені мойындап, Қазақстан құрамасының жалпыкомандалық есепте бірінші орын алғанын ресми түрде растады.

Бұған дейін қос мемлекеттің ұсынған мәліметтері екі түрлі болып, қоғамда біраз пікірталас тудырған еді. Қазақстанның Туризм және спорт министрлігі ұлттық құраманың 32 алтын, 20 күміс және 22 қоламен (барлығы 74 медаль) көш бастағанын мәлімдеген болатын. Алайда ұйымдастырушылар жариялаған кестеде Қырғызстан 30 алтынмен бірінші, ал Қазақстан 29 алтынмен екінші орында тұрды. Тіпті Қырғызстанның Дене шынықтыру және спорт жөніндегі мемлекеттік агенттігі Көшпенділер ойындарының тұжырымдамасына сәйкес жалпыкомандалық есеп мүлдем жүргізілмейтінін, басты мақсат — бәсекелестік емес, тарихи мұраны ұлықтау екенін алға тартқан.

Дегенмен жағдайға Қырғызстан Президентінің баспасөз хатшысы Асқат Алагөзов араласып, арнайы мәлімдеме жасады. Ол доданың жоғары деңгейде өткенін атап өтіп, медаль санаудағы техникалық ақаудың түзелгенін жеткізді.

«Әсіресе көкпар мен жерұлақта қырғыз және қазақ командалары тамаша ойын көрсетіп, бәсекелестіктің тек алаңда ғана қалатынын тағы бір мәрте дәлелдеді. Жанкүйерлер арасында да ешқандай келеңсіздік туындаған жоқ. Бұл үшін спортшыларға және екі елдің жанкүйерлеріне ерекше алғыс білдіреміз. Командалық есептегі жалғыз техникалық айырмашылық медальдарды санау кезінде пайда болды. Бүгін ұйымдастыру комитеті Қазақстанның үш спортшысының әрқайсысының медалін жеке есептеу туралы шешім қабылдады. Осылайша, жалпыкомандалық есепте Қазақстан бірінші орынды иеленді. Қазақ бауырларымызды жеңісімен құттықтаймыз!

Қырғызстандық спортшылар да бұл ойындарда өз күші мен шеберлігін лайықты көрсете білді. Медаль есебі — спорттың тек бір бөлшегі ғана, ал бұл ойындардың ең үлкен жеңісі — бәсекелестікті құрметпен өткізіп, бауырлас халықтардың ынтымағын тағы бір мәрте көрсете алғанымыз болды», — деді Асқат Алагөзов өз сөзінде.

Айта кетейік, биылғы Дүниежүзілік көшпенділер ойындары 31 тамыз бен 6 қыркүйек аралығында өтіп, оған үш мыңға жуық спортшы қатысты.