МЕМЛЕКЕТТІК БІЛІМ БЕРУ ГРАНТТАРЫНЫҢ ИЕГЕРЛЕРІ АНЫҚТАЛДЫ

ҚР Ғылым және жоғары білім министрлігі 2026-2027 оқу жылына арналған мемлекеттік білім беру гранттарының иегерлері тізімін жариялады. Биыл 75 мыңнан астам талапкер еліміздің жоғары оқу орындарында тегін білім алу мүмкіндігіне ие болды.

 Мемлекеттік білім беру тапсырысы экономиканың білікті кадрларға деген ұзақ мерзімді сұранысын ескере отырып қалыптастырылды. Мемлекет басшысының тапсырмасына сәйкес, білім беру гранттарының 60%-ы елдің индустриялық және технологиялық дамуы үшін стратегиялық маңызға ие инженерлік-техникалық бағыттарға бөлінді. Сонымен қатар, өңірлерді маманмен қамту үшін «Серпін» жобасы аясында екі мыңнан астам грант иегері Солтүстік, Шығыс және Орталық Қазақстанның жетекші оқу орындарында білім алатын болады.

Биыл грант тағайындау конкурсына шамамен 127 мың өтініш түсті (бұл өткен жылмен салыстырғанда 14 мыңға көп). Гранттарды бөлу барысында халықтың әлеуметтік осал топтарына арналған квоталар, халықаралық олимпиадалар мен ірі спорттық жарыстардың жеңімпаздарына берілетін жеңілдіктер, сондай-ақ мерзімді әскери қызмет өткерген азаматтарға арналған 1816 грант толық сақталды. Бұдан бөлек, қазақстандықтар үшін Қазақстаннан шықпай-ақ шетелдік жоғары оқу орындарының филиалдарында оқуға да гранттар қарастырылған.

 Конкурс нәтижесін мына ресми ресурстардан көре аласыз:

• https://t.me/SayasatNurbekOfficial

• https://www.gov.kz/memleket/entities/sci?lang=kk

• https://t.me/gylym_jogary_bilim

 Мемлекеттік гранттың электрондық куәліктері 3 жұмыс күні ішінде Ұлттық тестілеу орталығының grant.testcenter.kz сайтында қолжетімді болады. Ал ЖОО-ларға құжат қабылдау 25 тамызды қоса алғанға дейін жалғасады.