Астаналық оқушының Нью-Йорктегі жеңісі: Әлемнің ең дарынды жастарымен бір қатарда

Астана қаласындағы Ақан Құрманов атындағы №17 мектеп-гимназиясының 10-сынып оқушысы Аэлита Әділхан үлкен ғылыми жетістікке жетті - дейді Azattyq Rýhy.

Оның маусымдық аллергиялық ринитпен күресуге арналған ғылыми мақаласы әйгілі Oxford Journal of Student Scholarship студенттік журналында басылып шықты. Биылғы жылдың 11 тамызында жарық көрген және жеке DOI нөмірі берілген бұл еңбекте ешкі сүтінің биологиялық белсенді компоненттерінің адам иммунитетіне тигізер әсері терең зерттелген.

Жас зерттеуші өз жұмысында ешкі сүтінің құрамындағы пептидтер, олигосахаридтер мен май қышқылдары сияқты табиғи заттардың иммундық жүйемен қалай байланысатынын зерделеген. Мақалада бұл компоненттердің аллергия қозған маусымда адамның өмір сапасын жақсартудағы және иммундық жауапты реттеудегі ықтимал рөлі ғылыми тұрғыдан нақты дәйектелген.

Елорда әкімдігі жетістікті Астана қаласының білім беру жүйесіндегі зерттеушілік әлеуеттің жарқын көрінісі деп бағалап отыр. Мұндай халықаралық деңгейдегі еңбектер оқушылардың академиялық ізденісін шыңдап қана қоймай, олардың әлемдік білім кеңістігіне еркін енуіне үлкен жол ашады.

Аэлита тек бір зерттеумен шектеліп қалған жоқ. Әлемнің түкпір-түкпірінен ең дарынды жастарды іріктеп алатын Нью-Йорк ғылым академиясының Junior Academy бағдарламасына Қазақстаннан жол тартқан бес оқушының бірі атанды. Қазіргі таңда ол халықаралық командалармен бірлесіп биотехнология, инженерия және тұрақты даму салаларында жаңа жобаларды қолға алуда.

Ғылымдағы қадамынан бөлек, жас ғалымның қоғамдық белсенділігі де көпке үлгі. Оның қоржынында 170 сағаттан астам еріктілік тәжірибе бар. Аэлита ерекше білім беруді қажет ететін балаларға фортепиано мен орыс тілін үйретіп, қазақ балаларының ана тілін меңгеруіне бағытталған жобаларға белсенді қатысып келеді. Сонымен қатар, ол құрдастарын биоинженерия жаңалықтарымен таныстырып, жастарды ғылымға баулу ісін де қатар алып жүр.