Адам жасушасындай тетік: Жарты шақырымнан темірді сезетін құпия технология
Адамның тері жасушасындай ғана болатын титтей құрылғы алып сүңгуір қайықтардың үрейін ұшырары сөзсіз. Қытай ғалымдары ойлап тапқан жаңа технология жарты шақырым қашықтықтан кез келген темірді сезіп қояды. Әлемдік державаларды елең еткізген ғажайып жаңалықтың сыры неде? Кәдімгі жел тербеген шөптен шабыт алған физиктер қандай құпияны ашты?
Қытай ғалымдары адамның тері жасушасындай ғана болатын өте кішкентай, бірақ аса сезімтал құрылғы ойлап тапты. Кіп-кішкентай тетік жарты шақырым қашықтықта су астында жасырынып жатқан алып сүңгуір қайықтардың магниттік толқындарын оп-оңай тауып алады. Хэфэй және Нинбо институттарының зерттеушілері жасаған жаңа сенсор бұрын-соңды болмаған дәлдікке ие.
Кез келген сезімтал құрылғының басты жауы — ішкі шу. Магнитофонның даусын қатты шығарғанда ызыңдаған жағымсыз дыбыс қоса шығатыны сияқты, сенсордың да қуатын арттырған кезде кедергілер көбейеді. Ғалымдар мәселені шешу үшін өте қызық тәсіл тапты. Материалдың ішіндегі магниттік бөлшектерді жел тербеген шөп сияқты елестетіп көріңізші. Зерттеушілер сол шөптің тербелу жылдамдығын жасанды түрде арттырса, кедергі беретін шудың азаятынын байқаған. Нәтижесінде жаңа құрылғы сыртқы сигналдарды өте анық қабылдай отырып, ішкі шуды толығымен басып тастайды.
Жарты шақырымнан сүңгуір қайықты сезетін қабілеті әлемдік баспасөздің назарын аударғанымен, өнертапқыштардың негізгі мақсаты мүлдем басқа. Жаңа технология ең алдымен медицина саласына арналған. Құрылғының көмегімен адамның жүрегі мен миындағы болмашы өзгерістерді аса жоғары дәлдікпен өлшеуге, заманауи зертханалық аппараттар мен көлік қауіпсіздігі жүйелерін жасауға мүмкіндік туады. Физиктер болашақта аспаптың сезімталдығын қазіргіден де еселеп арттыруға болатынына толық сенімді.
Пікірлер
Әзірге пікір жоқ. Алғашқы пікірді қалдырыңыз!
