Студенттер күннен қуат алатын медициналық көлік ойлап тапты

Эйндховен технологиялық университетінің студенттері күн сәулесінен қуат алатын әлемдегі алғашқы мобильді медициналық бекет — Stella Juva прототипін таныстырды.

Қазіргі таңда жер бетінде бір миллиардқа жуық адам электр желісі тартылмаған, жолы нашар аймақтарда өмір сүреді. Ондай шалғай елді мекендерге вакцина сақтайтын тоңазытқыш сияқты қарапайым медициналық құрылғыларды жеткізіп, іске қосудың өзі үлкен машақат. Ал күннен қуат алатын жаңа көлік аталған мәселені түбегейлі шешуге қауқарлы. Оның ұтқырлығының арқасында ең шалғай ауылдарға дейін дәрі-дәрмек пен қажетті жабдықтар кедергісіз жетеді.

Stella Juva-ның шассиі мен шанағы көміртек талшықты композиттен жасалған. Осылайша көліктің салмағын кәдімгі үлгілердегідей 3500 емес, небәрі 1350 келіге дейін жеңілдету мүмкін болды. Төбесі мен жиналмалы тіреулерінде күн панельдері орналасқан. Жарықты барынша көп сіңіру мақсатында электр түйіспелерінің бәрі панельдің артқы жағына жасырылған. Құрылғының ішіне мыс сымдар тартылып, күміссіз металл жалатылғандықтан, беріктігі айтарлықтай артты. Яғни, тасжол жоқ аймақтардағы дірілден микрожарықшақтар пайда болмайды әрі элементтердің тозу қаупі азаяды.

Негізгі аккумулятордың сыйымдылығы — 50 кВт⋅сағ. Есептеулерге сүйенсек, көлік толық қуатпен сағатына 120 шақырым жылдамдықпен 715 шақырымға дейін жол жүре алады. Күн көзі көрінбейтін дауыл немесе құмды боран кезінде бір-екі күн аялдап тұруға да толық жарайды. Электр жүйесі қос тізбекті етіп жасалған: қуат деңгейі тым азайып кеткен жағдайда көлік тоқтап, қалған энергия тек қана медициналық құрылғыларға беріледі.

Осы айда Stella Juva өркениеттен жырақ, нағыз дала жағдайында сынақтан өту үшін Кенияға аттанады.