Ит пен мысыққа да «жеке куәлік» керек: 22 тамыздан бастап қандай өзгеріс күшіне енеді?

Үй жануары – тек ермек емес, отбасының толыққанды мүшесі. Дегенмен, енді сүйікті төрт аяқты досыңызға тек мейірім төгіп қана қоймай, оны заңға сай тіркеуден өткізуге тура келеді. Қазақстанда үй жануарларын есепке алудың тәртібі қатаңдап, жаңа ережелер бекітілді.

Осы уақытқа дейін жануар иелері үй гүлдеріндей мәпелеген ит-мысығын тіркеу кезінде таңбалаудың түрлі әдістерін өз еркімен таңдай алатын. Енді жүйеге нүкте қойылды. Экология және табиғи ресурстар министрлігінің жаңа бұйрығына сәйкес, 22 тамыздан бастап ит пен мысықты тіркеу үшін микрочип орнату міндетті саналады. Чиптегі бірегей нөмір жануардың негізгі тіркеу құжатына айналады. Өзгеріс жануарлардың қауіпсіздігін қамтамасыз етіп, жоғалып кеткен жағдайда иесін тез табуға үлкен септігін тигізбек.

Ал басқа үй жануарларының иелері уайымдамаса да болады. Оларға мұндай қатаң талап қойылмайды. Иесі өз қалауы мен қалтасына қарай кез келген сәйкестендіру құралын бұрынғыдай таңдай береді.

Иттер мен мысықтарға чип салу жұмыстарын арнайы рұқсаты бар ветеринариялық клиникалар, білікті мамандар және әкімдікке қарасты мемлекеттік мекемелер жүргізеді. Микрочипті сатып алу және оны орнату шығындарын жануардың иесі өз мойнына алатынын ескерген жөн. Жаңа бұйрық ресми жарияланғаннан кейін он күн өткен соң, яғни 22 тамызда толықтай күшіне енеді. Сондықтан жаңа заң талабына бейжай қарамай, сүйіктіңіздің құжатын ертерек реттеп қойған артық етпейді.