TikTok-тағы кездейсоқ видео ғалымдарға жер астында тіршілік ететін сирек жыланбалықты табуға көмектесті
Үндістанның Бихар штатында ғалымдар Үнді-Ганг жазығының жер асты суларында тіршілік ететін Gangaichthys indonepalicus атты жаңа балық түрі мен жаңа туысын анықтады. Бұл — Ганг алабынан тіркелген алғашқы жерасты балығы.
Ғылыми жаңалыққа 2024 жылы TikTok-та жарияланған қысқа видео себеп болған. Онда Үндістан мен Непал шекарасына жақын жердегі су ұңғымасынан ерекше кішкентай балықтың шыққаны көрінеді. Видеоны байқаған зерттеушілер оның сыртқы ерекшеліктеріне қызығушылық танытып, балықты арнайы іздеуге кіріскен.
Зерттеу барысында мамандар Бихардағы ұңғымалардан мыңдаған литр су қолмен сорып, балық үлгілерін жинаған. Алғашқы дарақ шамамен 2 мың литр су шығарылғаннан кейін табылғанымен, зақымданып, тірі қалмаған. Тағы 500 литр су сорылған соң зерттеушілер бүтін сақталған екінші үлгіні тапқан.
Ұзындығы шамамен 4 сантиметр болатын бұл балық толық қараңғылықта өмір сүруге бейімделген. Оның денесі түссіз әрі мөлдірге жуық, көздері тері қабатымен жабылған, ал қабырғалары байқалмайды.
Микро-КТ зерттеуі мен генетикалық талдау оның бұрын ғылымға белгісіз жаңа туысқа жататынын растады. Gangaichthys жаңа туысы Chaudhuriidae тұқымдасына кіреді. Атаудағы Gangaichthys — «Ганг балығы», ал indonepalicus атауы балықтың Үндістан мен Непал шекарасы маңынан табылғанын білдіреді.
Ғалымдардың пікірінше, бұл жаңалық жер астындағы тіршілік әлемінің әлі де толық зерттелмегенін көрсетеді.
Пікірлер
Әзірге пікір жоқ. Алғашқы пікірді қалдырыңыз!
