Балқаштың жаңа қожайыны: Үміт жолбарыстың жабайы табиғаттағы алғашқы 10 күні қалай өтті?

«Іле-Балқаш» мемлекеттік табиғи резерватына жіберілген Үміт есімді жолбарыс жабайы табиғатқа сәтті бейімделіп келеді. Мамандар жыртқыштың алғашқы он күндік өмірін қорытындылап, оның өз бетінше аң аулауға толық қауқары бар екенін қуанышпен хабарлады.

Орман шаруашылығы және жануарлар дүниесі комитетінің мәліметінше, биологтар Үміттің әр қадамын мойынбауындағы GPS құрылғысы мен фототұзақтар арқылы жіті бақылап отыр. Жүйеден алынған координаттар бойынша мамандар далалық зерттеулер жүргізіп, аңның жүрген жерлерін зерделеуде. Жаңа ортаға тап болған жыртқыш алғашқы күндері-ақ өзінің мықтылығын дәлелдеген. Мониторинг барысында оның алдымен қасқырды олжалап, бірнеше күн бойы сонымен қоректенгені белгілі болды. Көп ұзамай жолбарыстың тырнағына жабайы қабан да ілікті. Мамандар жағдайды түз тағысының жаңа ортаға толық сіңісіп, дербес тіршілік ете бастағанының айқын көрінісі деп бағалап отыр.

Қызығы сол, Үміт тек ғалымдардың ғана емес, қалың бұқараның да назарын өзіне аударып, әлеуметтік желінің нағыз жұлдызына айналды. Оқырмандар жасанды интеллекттің көмегімен жыртқыштың өмірі туралы түрлі креативті видеолар жасауды қолға алған. Әсіресе, «Qreative_qazaq» авторының Үміттің Балқаштағы хикаяларына арналған шағын сериалы желіде кең тарады.

Жолбарыс пен жабайы қабан арасындағы шынайы оқиғаларға негізделген бұл күлкілі әрі тартымды хикаялар миллиондаған қаралым жинап, көрерменнің ықыласына бөленуде. Қазірдің өзінде желі қолданушылары пікір жазып, Үміттің жаңа «приключенияларын» асыға күтіп жүр. Ал жауапты мамандар жолақ аңның күнделікті қозғалысы мен табиғатқа бейімделу процесін қадағалауды әрі қарай да жалғастыра бермек.