ДДСҰ хантавирустың өршуі 2 шілдеде аяқталуы мүмкін екенін мәлімдеді

ДДСҰ Бас директоры Тедрос Адханом Гебрейесустың айтуынша, қазіргі уақытта хантавирустық инфекцияның 13 расталған жағдайы тіркелген. Оның ішінде үш адам қайтыс болған.

Ұйымның мәліметінше, індет туралы алғашқы хабарлама 2 мамырда түскеннен бері 33 ел мен аумақта 650-ден астам байланыста болған адам анықталған. Олардың басым бөлігі карантин мерзімін аяқтаған. Қалған 54 адамның бақылау мерзімі 2 шілдеде аяқталады.

«Егер осы уақытқа дейін жаңа жағдайлар тіркелмесе, індет аяқталды деп есептейміз», – деді Тедрос Адханом Гебрейесус.

Індет қалай басталды?

Euronews мәліметінше, халықаралық алаңдаушылық Нидерланд туы астында жүзген MV Hondius круиздік кемесіндегі оқиғадан кейін күшейген.

Кеме 1 сәуірде Аргентинаның Ушуайя қаласынан жолға шығып, Оңтүстік Атлантикадағы бірнеше аралға саяхат жасаған. Сапар барысында үш жолаушы қайтыс болып, қалғандары кейін Испанияның Тенерифе аралына эвакуацияланған.

ДДСҰ қазіргі уақытта жергілікті билік органдарымен бірлесіп індеттің пайда болу себептері мен таралу жолдарын зерттеуді жалғастырып жатыр. Сонымен қатар вирус үлгісі Швейцариядағы WHO BioHub халықаралық биобанкіне жіберіліп, болашақта диагностика, вирусқа қарсы препараттар мен вакциналарды әзірлеуге пайдаланылмақ.

Ғалымдар нені анықтады?

Ал Science News ғылыми басылымының мәліметінше, хантавирустың адам ағзасына әсер ету механизмі тұмау немесе COVID-19 сияқты респираторлық вирустардан айтарлықтай ерекшеленеді.

Ғалымдардың айтуынша, вирус өкпе жасушаларын емес, қан тамырларының ішкі қабатын қаптайтын эндотелий жасушаларын зақымдайды. Соның салдарынан қан тамырларының өткізгіштігі артып, қан плазмасы өкпеге жиналады. Нәтижесінде науқаста тыныс алу жеткіліксіздігі өте жылдам дамуы мүмкін.

Зерттеушілердің айтуынша, хантавирустың тағы бір ерекшелігі – оның ұзақ инкубациялық кезеңі. Кейбір жағдайларда ауру белгілері вирус жұқтырғаннан кейін 45 күнге дейін байқалмауы мүмкін. Алайда алғашқы симптомдар пайда болғаннан кейін науқастың жағдайы бірнеше сағаттың ішінде күрт нашарлауы ықтимал.

Science News дерегіне сәйкес, қазіргі таңда хантавирусқа қарсы тиімділігі дәлелденген арнайы ем немесе вакцина жоқ. Дегенмен ғалымдар қан тамырларының зақымдану механизмін зерттеу арқылы жаңа терапиялық препараттарды әзірлеу бағытында жұмыстар жүргізіп жатыр.

Мамандардың пікірінше, соңғы індет әлемде кең таралған пандемия қаупін туғызбайды. Соған қарамастан, бұл жағдай хантавирусты тереңірек зерттеуге және болашақта індеттердің алдын алуға мүмкіндік беретін маңызды ғылыми деректер жинауға ықпал етеді.