Робот-ассистенттер және заманауи эндопротездеу: Астанадағы ортопедтердің халықаралық басқосуы мәресіне жетті

Астанада «Диагностикадан оңалтуға дейінгі пәнаралық травматология және ортопедия» тақырыбына арналған XIII Халықаралық ғылыми-практикалық конференция мәресіне жетті. 10-11 қыркүйекте өткен екі күндік ауқымды жиын Н.Ж. Батпенов атындағы Ұлттық ғылыми травматология және ортопедия орталығының 25 жылдығы мен Қазақстан Республикасы Тәуелсіздігінің 35 жылдығына орайластырылды.

Алқалы жиынға Қазақстанның түкпір-түкпірінен және шетелден 600-ге жуық маман жиналды. Олардың қатарында білікті травматолог-ортопедтер, нейрохирургтер, оңалту мамандары, мейіргерлер мен ғалымдар бар. Ғылыми бағдарлама аясында жамбас және тізе буындарын заманауи эндопротездеу, артроскопиялық хирургия, омыртқа хирургиясы мен вертебрологиядағы соңғы инновациялар талқыланды. Балалар травматологиясы, реконструктивті хирургия, сүйек ісіктерін емдеу мен медициналық оңалту мәселелері де назардан тыс қалмады.

Шетелдік сарапшылардың баяндамалары конференцияның салмағын арттыра түсті. Әлемнің түкпір-түкпірінен келген дәрігерлер күрделі операциялар жасау тәжірибесімен бөлісіп, саладағы жаңа технологияларды таныстырды. Сонымен қатар робот-ассистенттің көмегімен тізе буынын эндопротездеуге арналған сателлиттік симпозиумдар мен заманауи медициналық жабдықтар көрмесі көпшіліктің қызығушылығын оятты.

Конференцияның ең маңызды сәттерінің бірі – Азия-Тынық мұхиты ортопедиялық қауымдастығы (APOA) мен Қазақстан травматолог-ортопедтер қауымдастығының (KATO) бірлескен отырысы болды. Жастар да ескеріліп, дәстүрлі «Батпенов оқулары» байқауында үздік жас ғалымдар марапатталды. Екі күнге созылған шара отандық және шетелдік мамандар арасындағы тәжірибе алмасудың, жаңа кәсіби байланыстар орнатудың теңдессіз алаңына айналды.