Адам тәрізді роботтар алғаш рет күрделі ота жасады

Сан-Диего қаласындағы Калифорния университетінің ғалымдары мен дәрігерлері әлемде алғаш рет адам тәрізді роботтардың көмегімен жануарларға екі бірдей күрделі ота жасады. Бұл бұрыннан белгілі, орнынан қозғалмайтын дәу аппараттар емес, кәдімгі адам пішініндегі әмбебап андроидтар. Бірінші ота кезінде құрылғыны хирург қашықтан басқарса, екіншісінде дәрігер тек бақылаушы қызметін атқарды. Осылайша, медицина әлемінде жаңа дәуірдің есігі айқара ашылды.

Қазіргі таңда ауруханаларда қолданылып жүрген робот-хирургтердің салмағы бір тоннаға дейін жетеді. Олар өте күрделі, әрі арнайы бағдарламалармен ғана жұмыс істейді. Мұндай алып құрылғыларды ірі клиникаларда жоспарлы ота жасау үшін ғана қолдануға болады. Ал оларды төтенше жағдай болған аймақтарға немесе дала госпитальдарына апару мүмкін емес.

Жаңадан құрастырылған Surgie деп аталатын андроидтардың бойы бір жарым метр, ал салмағы небәрі жиырма жеті келі. Адамға ұқсас пішіні мен қолдарындағы арнайы қондырмаларының арқасында олар кәдімгі хирургиялық құралдарды емін-еркін қолдана алады. Бұл олардың дәрігерлермен бірге кез келген жерде, тіпті шатырлы дала ауруханаларында да қатар жұмыс істеуіне жол ашады. Оларды адамның жанында тұрып та, қашықтан байланыс арқылы да басқару өте ыңғайлы.

Дегенмен, бұл жаңалықтың әзірге кемшіліктері де жоқ емес. Ең басты мәселе — байланыс сапасына тікелей тәуелділік. Ота кезінде күтпеген жағдай туындаса, сигналдың сәл де болсын кешігуі өмірге қауіп төндіруі мүмкін. Екінші қиындық — әрбір медициналық құрал үшін роботты жеке баптау немесе қондырмасын ауыстыру қажет. Инженерлер бұл процесті жетілдіріп, лапароскопиялық ота уақытын бірнеше сағаттан отыз минутқа дейін қысқартқанымен, қауіп-қатер әлі де бар.