Екі ауыр операцияның орнына — бір ғана ота: Әлемдік хирург пен қазақ дәрігерлері тікелей эфирде бірегей операция жасады

30 қазанда академик Н.Ж. Батпенов атындағы Ұлттық ғылыми травматология және ортопедия орталығында «HKA 2026» халықаралық ғылыми-тәжірибелік конференциясы басталды. Орталық ұйымдастырған екі күндік жиында Қазақстан, Түркия және Ресейдің білікті травматолог-ортопедтері бас қосып, жамбас пен тізе буындарын күрделі эндопротездеудің өзекті мәселелерін талқыға салды.

Алғашқы күннің ең маңызды сәті — тікелей эфирде өткен (Live Surgery) шеберлік сағаты болды. Буын алмастыру және протез маңындағы инфекцияларды емдеу бойынша әлемге танымал сарапшы, профессор Джавад Парвизи ҰҒТОО хирургтерімен бірлесіп бірегей ота жасады. Дәрігерлер асқынған инфекция кезінде тізе буынындағы протезді бір ғана отамен қайта ауыстырып шықты. Залда жиналған мамандар операция барысын экраннан тікелей бақылап, әлемдік деңгейдегі хирургтің жұмыс тәсілімен іс жүзінде танысты.

Тәжірибелік бөлімнен кейін дәрігерлер ғылыми баяндамалар жасап, тәжірибеде кездесетін ең ауыр клиникалық жағдайларды ортаға салды. Жиында буын алмастырудың жаңа әдістері, қайталама (ревизиялық) оталардың қыр-сыры және операциядан кейінгі инфекциялық асқынулардың алдын алу жолдары жан-жақты сөз болды.

31 қазанда жалғасқан конференцияның екінші күні де мазмұнды өтуде. Шетелдік және отандық сарапшылар күрделі диагноздарды талдап, өзара тәжірибе бөлісуді жалғастырып жатыр.

ҰҒТОО қабырғасында өткен бұл басқосу отандық дәрігерлердің шетелдік әріптестерімен тікелей пікір алмасуына жол ашып, елімізде ауыр ортопедиялық дерттерді емдеу сапасын жаңа деңгейге көтеруге серпін береді.