Трамп пен Покемон: Жапония үкіметі АҚШ-тың саяси контентіне қарсылық білдірді

Жапонияның үкімет өкілдері Трамп әкімшілігінен әлеуметтік желілерде жариялайтын саяси жазбаларында Pokémon, Nintendo, Naruto және т.б. танымал франшизаларды пайдалануды доғаруды бірнеше рет сұраған. Осы аптада Mainichi Shimbun басылымының хабарлауынша (IGN арқылы), Жапонияның Сыртқы істер министрлігі маусым айының өзінде-ақ Трамп әкімшілігіне бұл бассыздықты тоқтатуды сұрап, ресми өтініштер жолдаған.

Ақ үйдің әлеуметтік желілердегі тобы соңғы бір жыл бойы жастардың тілін табуға барынша тырысып келеді. Олар күні-түні ғаламторда отыратын геймерлердің көңілінен шығу үшін жапондық авторлық құқыққа тиесілі туындыларды пайдаланып, өздерінің мағынасыз саясатын қолдау мақсатында түрлі мемдер жасауда.

Мәселен, 2025 жылдың қыркүйегінде Ұлттық қауіпсіздік департаменті Иммиграция және кедендік бақылау қызметінің (ICE) адамдарды тұтқындап жатқан кадрларының үстінен түпнұсқа Pokémon әні ойналатын видео жариялады. Ал осы жылдың наурыз айында Ақ үйдің X (бұрынғы Twitter) желісіндегі аккаунты Ирандағы зымыран соққылары мен Wii Sports кадрлары араласқан бейнеролик салды. Кейінірек олар «Американы қайтадан ұлы етейік» (MAGA) деген кезекті жазбасын жариялау үшін жанкүйерлер жасаған Pokémon Pokopia мәтін генераторын пайдаланған.

The Pokémon Company өз контентінің бұлайша пайдаланылуына қатысты пікір білдіріп, бұл іске еш қатысы жоқ екенін және Трамп әкімшілігі олардың туындысын қолдануға рұқсат сұрамағанын кесіп айтты. Ал қазір Жапония үкіметі Трамп пен оның әлеуметтік желідегі «тролльдер армиясына» бұл әрекеттерінің жапондық туындыларға қаншалықты зиян келтіріп жатқанын түсіндіру мақсатында сахна сыртында белсенді келіссөздер жүргізіп жатқан сыңайлы.

Дегенмен, Nintendo деңгейіндегі ресурстары мен беделі бар ірі компаниялар бұған қарсы заңды тұрғыда қатаң шара қолдануға батылдық танытпаса, өкінішке орай, бұл «мем жасау» үрдісі жалғаса беретін түрі бар.