Қазақстандықтардың жүргізуші куәлігі Қытайда да жарамды болады

Қазақстан мен Қытай ұлттық жүргізуші куәліктерін өзара мойындауға келісті. Шешім ҚР Ішкі істер министрі Ержан Сәденовтің Бейжіңге жұмыс сапары аясында қабылданды.

Қытайдың Қоғамдық қауіпсіздік министрі Ван Сяохунмен кездесу барысында қауіпсіздік саласындағы екіжақты ынтымақтастық мәселелері талқыланды. Polisia.kz порталының хабарлауынша, министрлер ұлттық жүргізуші куәліктерін өзара тану және айырбастау туралы ортақ мәмілеге келген.

«Жаңашылдық екі ел азаматтары үшін қағазбастылықты азайтып, құжат ресімдеу машақатын жеңілдетеді. Сондай-ақ туристік және іскерлік мақсаттағы өзара барыс-келіске барынша қолайлы жағдай туғызады», – деп хабарлады ІІМ баспасөз қызметі.

Сонымен қатар, Үкіметаралық деңгейде «Қорғас» халықаралық шекара маңы ынтымақтастығы орталығында қоғамдық тәртіп пен қауіпсіздікті қамтамасыз ету туралы келісімге қол қойылды. Ведомство өкілдерінің айтуынша, құжат – орталық аумағындағы қауіпсіздіктің құқықтық тетіктерін заңдастыру бағытындағы ұзақ жылғы бірлескен жұмыстың нәтижесі.

«Аталған келісім қос мемлекеттің құзырлы органдары арасындағы өзара іс-қимыл тәртібін бекітеді. Ендігі кезекте құқық бұзушылықтың алдын алу, төнген қауіпке шұғыл ден қою және халықаралық орталықта жүрген азаматтардың қауіпсіздігін толыққанды қорғау әлдеқайда тиімді жүзеге асады», – деп нақтылады министрліктегілер.