ҚТЖ жұмысына сын: теміржолмен тасымалданатын жүк пен жолаушылар саны азайған

Қазақстанның теміржол көлігі 2026 жылдың қаңтар-шілде айларында жүк те, жолаушы да тасымалдау көлемінің төмендегенін көрсетті, деп хабарлайды NBK.

Halyk Finance сараптамалық орталығының көлік саласына арналған шолуына сәйкес, 2026 жылдың алғашқы жеті айында теміржол арқылы тасымалданған жүк көлемі 1,7%-ға төмендеген. Ал жүк айналымы шамалы өсіп, 2,5%-ды құрады.

Жолаушылар тасымалы да азайған. Қаңтар-шілде аралығында теміржол қызметін пайдаланған жолаушылар саны 3,5%-ға қысқарып, 11,1 миллион адамды құрады.

«Теміржол саласында тасымалданған жүк көлемі төмендегенімен, жүк айналымы өскен. Бұл бір жүктің орташа тасымалдау қашықтығы ұлғайғанын көрсетуі мүмкін», – деп түсіндірді Halyk Finance аналитикалық орталығының жетекшісі Салтанат Игенбекова.

Теміржол саласы – жүк және жолаушы тасымалының екеуінде де бірдей төмендеу байқалған жалғыз көлік түрі.

Салыстырмалы түрде автомобиль көлігімен жүк тасымалдау көлемі 6,2%-ға, теңіз көлігімен 7,2%-ға артқан. Әуе көлігі арқылы жүк тасымалы 8,1%-ға төмендегенімен, жолаушылар тасымалы 2,8%-ға өсіп, 9,2 миллион адамға жеткен.

Автомобиль көлігімен сапарлайтын қазақстандықтардың саны 4,6%-ға, ал такси қызметіне сұраныс 3,2%-ға артқан.

Жалпы көлік саласында өсім байқалады: жүк тасымалдау көлемі жылдық есеппен 0,9%-ға, жүк айналымы 1%-ға, жолаушылар тасымалы 4,5%-ға, ал жолаушы айналымы 6,1%-ға өскен.

Осы көрсеткіштер аясында «Қазақстан темір жолы» компаниясының жұмыс тиімділігіне қатысты сұрақтар туындауы мүмкін.