ҚТЖ өңірлердегі мамандарды тұрақтандыру үшін арнайы ипотека әзірледі

«Қазақстан темір жолы» ҰК» АҚ басқарма төрағасы Талғат Алдыбергенов «Самұрық-Қазына» қорының қоғамдық кеңес отырысында сала қызметкерлеріне арналған жаңа тұрғын үй бағдарламасының шарттарын түсіндірді.

Digitalnomads.kz тілшісінің сұрағына жауап берген компания басшысы жобаның, ең алдымен, жұмыс күші тұрақтамайтын және маман тапшылығы қатты сезілетін өңірлердегі теміржолшыларды қолдауға бағытталғанын атап өтті.

«Мемлекет басшысының тікелей қолдауымен басталған бұл бағдарламаның шарттары өте тиімді. Ипотеканың жылдық мөлшерлемесі небәрі 4 пайызды құрайды, ең бастысы – алғашқы жарна төлеудің қажеті жоқ. Несиені 16 жылға дейінгі мерзімге рәсімдеуге болады. Алғашқы лекте осы бағдарлама арқылы 534 отбасын баспаналы етуді көздеп отырмыз. Берілетін пәтерлер ҚТЖ-ның өндірістік нысандарына жақын, сондай-ақ мектеп пен балабақшаға жаяу баратын қашықтықта салынған», – деді Талғат Алдыбергенов.

Қазіргі таңда аталмыш бағдарлама Астана, Қарағанды, Павлодар, Қостанай және Семей қалаларында жүзеге асырылып жатыр. ҚТЖ басшысының айтуынша, алдағы уақытта бұл тізімге басқа да өңірлерді қосу мәселесі қарастырылып жатыр.