Қазақстанда 262 шетелдік IT маманы Digital Nomad мәртебесіне ие болды

Digital Nomad Residency және Digital Nomad Visa бағдарламалары аясында 262 шетелдік IT маманы Қазақстанда тұруға және кәсіби қызметін дамытуға мүмкіндік беретін тиісті мәртебеге ие болды.

Astana Hub халықаралық технологиялық қауымдастықпен байланысты нығайту және Қазақстанға білікті IT мамандарын тартуға бағытталған Digital Nomad Residency (DNR) және Digital Nomad Visa (DNV) бағдарламаларының нәтижелерін жариялады.

2026 жылғы тамыздағы жағдай бойынша 250 шетелдік IT маманы Digital Nomad Residency бағдарламасы арқылы Қазақстанда тұрақты тұруға рұқсат алды. Ал тағы 12 маман Digital Nomad Visa иегері атанды.

Осылайша, бүгінгі таңда аталған бағдарламалар аясында жалпы 262 шетелдік IT маманы тиісті мәртебеге ие болды.

Бағдарламалар Қазақстанның әлемдік технологиялық қауымдастықпен байланысын нығайтуға, халықаралық тәжірибені тартуға және отандық IT экожүйені дамытуға бағытталған.

Astana Hub мәліметінше, 2026 жылғы тамыздағы жағдай бойынша 1 069 қолдаухат рәсімделген. Оның ішінде 1 030-ы Digital Nomad Residency, ал 39-ы Digital Nomad Visa бағдарламасы бойынша берілген.

Сонымен бірге Astana Hub қолдаухаты виза немесе Қазақстанда тұрақты тұруға рұқсат болып саналмайды. Құжаттарды рәсімдеу бірнеше кезеңнен тұрады: өтінім беру, оны қарау, Astana Hub қолдаухатын алу және одан кейін мемлекеттік органдар белгілеген рәсімдерден өту. Түпкілікті шешімді уәкілетті мемлекеттік органдар қабылдайды.

Бағдарламалар кәсіби талаптарға сай келетін шетелдік IT мамандарына арналған. Олардың қатарында бағдарламалық жасақтама әзірлеушілері, product-менеджерлер, жасанды интеллект мамандары, деректер талдаушылары, технологиялық кәсіпкерлер, стартап негізін қалаушылар және халықаралық компанияларда немесе шетелдік жұмыс берушілермен қашықтан жұмыс істейтін цифрлық сала өкілдері бар.

Халықаралық IT мамандарын тарту қазақстандық командалармен тәжірибе алмасуға, технологиялық кәсіпкерлікті дамытуға және кәсіби IT қауымдастықты кеңейтуге мүмкіндік береді. Сонымен қатар, шетелдік мамандардың Қазақстанда тұруы жергілікті тауарлар мен қызметтерге сұранысты арттырып, экономикалық белсенділікке де ықпал етеді.

Digital Nomad Visa (DNV) — Қазақстанға келіп, кейіннен тұрақты тұруға рұқсат алуды жоспарлайтын шетелдік IT мамандарына арналған B9-1 санатындағы виза.

Ал Digital Nomad Residency (DNR) — шетелдік IT мамандарының Қазақстанда тұрақты тұруға рұқсат алуына арналған тетік. Оның нәтижесінде үміткерге виза емес, тұрақты тұруға рұқсат беріледі.