Ғалымдар жүзудің арқаға пайдасын дәлелдеді

Компьютер алдында сағаттап отыру, аз қимылдау немесе ауыр жұмыс — бұл факторлар бүгінде көбіміздің белімізді бүкірейте бастады. Арқадағы ауырсынудан зардап шегетіндер қымбат массаждарға барып, түрлі дәрілерді ішіп жатады. Алайда, Австралияның Маккуори университетінің ғалымдары бұл дерттің өте қарапайым, жағымды әрі табиғи емін тапты. Ол — жүзу.

Ғалымдардың айтуынша, бассейнге тұрақты түрде бару белдегі созылмалы ауруларды 50 пайызға дейін азайтады екен. Бұл жай ғана болжам емес, нақты ғылыми тәжірибемен дәлелденген факт!

Зерттеушілер 12 аптадан астам уақыт бойы бел ауруынан қиналған, қозғалысы шектелген 76 адамды (орташа жасы 41-де) жинап, екі топқа бөлген:

1. «Жүзгіштер» тобы: 8 апта бойы жүйелі түрде бассейнге барып, физиотерапевт мамандардан кеңес алып тұрды.

2. «Теоретиктер» тобы: Суға түспеген, тек пайдалы ақпараттар мен білім беретін сабақтарға ғана қатысқан.

«Жүзгіштер» үшін арнайы жаттығу жоспары құрылып, олар аптасына үш рет 30-45 минуттан су кешіп, арқа бұлшықеттерін шынықтырды. Нәтижесінде не болды десеңізші?

Сегіз аптадан кейін жүзумен айналысқан топтың бел ауруы екі есеге (50%) азайғаны белгілі болды! Ал тек теориямен шектелген екінші топта мұндай айтарлықтай өзгеріс байқалмаған.

Ең кереметі — бұл уақытша ғана жеңілдік емес. Ғалымдар қатысушыларды жарты жыл (26 апта) және бір жыл (52 апта) өткен соң қайта тексергенде, «жүзгіштердің» жағдайы әлі де жақсы екенін, аурудың қайта мазаламағанын көрген. Көпшілігі тәжірибе аяқталса да, бассейнге баруды әдетке айналдырып, салауатты өмір салтын жалғастырған.

Неліктен дәл осы спорт түрі арқаға соншалықты пайдалы? Зерттеушілер мұның сырын былай түсіндіреді:

Су денені жеңілдетіп, омыртқаға түсетін салмақты азайтады. Құрлықта жасауға қиын әрі ауырсынатын қимылдарды суда еш қиындықсыз орындауға болады.

Жүзу қозғалыс амплитудасын жақсартып, арқа мен бел бұлшықеттерін біркелкі қатайтады.

Аэробты жаттығулар ретінде жүзу бүкіл ағзаның төзімділігін арттырып, қан айналымын жақсартады.

Егер сізді де созылмалы бел ауруы мазалап жүрсе, мүмкін, дәріханаға емес, жақын маңдағы бассейнге абонемент алудың уақыты келген болар? Денсаулығыңыз өз қолыңызда, ал судың шипасы — бәріне ортақ!