Қазақстан табиғаты Голливудты тамсандырды: Джеки Чан Маңғыстаудың әлеуетін жоғары бағалады
Джеки Чанның өзі Маңғыстаудың табиғатына таңдай қағып, «бұл болашақ фильмнің ең мықты әрі көрнекті кадрларына айналады» деп баға беріп үлгеріпті. Бұл – еліміздің туризмі мен киноиндустриясы үшін нағыз джекпот! Sәlem Entertainment компаниясы қолға алған бұл жоба Қазақстанды бүкіл әлемге мүлдем жаңа қырынан танытқалы тұр.
13 шілдеде Маңғыстау облысының әкімі Нұрдәулет Қилыбай өңірге арнайы келген әлемге әйгілі актер, режиссер әрі жекпе-жек өнерінің шебері Джеки Чанмен кездесті. Голливуд жұлдызы Қазақстанға халықаралық «Доспехи Бога 4: Ультиматум» (Armour of God: Ultimatum) көркем фильмінің түсіріліміне қатысу үшін табан тіреген.
Ауқымды халықаралық киножобаның негізгі түсірілім алаңы ретінде Маңғыстаудың, оның ішінде әлемге әйгілі Бозжыра шатқалының таңдалуы кездейсоқ емес. Бұл әлемдік киноиндустрияның Қазақстанның бірегей табиғи ландшафттарына деген қызығушылығының артып келе жатқанын айқын көрсетеді.
Кездесу барысында облыс әкімі Нұрдәулет Қилыбай мұндай ауқымды халықаралық жобалар өңірдің туристік әлеуетін арттырып, инвестиция тартуға және Маңғыстауды әлемдік деңгейде танытуға зор серпін беретінін атап өтті. Өз кезегінде Джеки Чан қазақ елінің қонақжайлығына алғыс білдіріп, Маңғыстаудың табиғи ландшафттары ерекше кинематографиялық әлеуетке ие екенін және болашақ фильмнің ең көрнекті көріністерінің біріне айналатынына сенім білдірді.
Айта кетейік, «Доспехи Бога 4: Ультиматум» жобасы ҚР Мәдениет және ақпарат министрлігінің қолдауымен жүзеге асырылуда, ал фильмнің өндірісімен отандық «Sәlem Entertainment» компаниясы айналысады.
Пікірлер
Әзірге пікір жоқ. Алғашқы пікірді қалдырыңыз!
