Аустралия Дуровқа соғыс жариялады: Енді Telegram жаппай бұғаттала ма?

Аустралияның интернет кеңістігіндегі қауіпсіздікті қадағалайтын басқармасы (eSafety) әйгілі Telegram желісіне қарсы үлкен сот ісін бастады. Бұған мессенджер басшылығының терроризмді дәріптейтін қатыгез материалдарды бұғаттауға құлық танытпауы түрткі болып отыр.

Бір жылға созылған мұқият тергеу нәтижесі көрсеткендей, Telegram жергілікті заңнаманы белшесінен басқан. Пайдаланушылар лаңкестердің адам өлтірген сәттері немесе қанды қырғындар туралы талай рет дабыл қақса да, желі әкімшілігі бұл сұмдық кадрларды апталап өшірмеген. Тіпті бүкіл әлемді дүр сілкіндірген Крайстчерч пен Буффалодағы атыс видеолары платформада еш кедергісіз үш айға жуық уақыт бойы тұрған екен.

Бұл ғана емес, мессенджердің ішкі ережелерінде мұндай сұмдыққа нақты тыйым салынбағаны, ал шағым жазған адамдарға ешқандай кері байланыс берілмегені де анықталып отыр. Енді осындай өрескел салғырттығы үшін компанияға 54,6 миллион Аустралия долларына дейін қыруар айыппұл салынуы әбден мүмкін.

Мекеме басшысы Джули Инман Гранттың сөзінше, мұндай контенттің көз алдымызда ашық жатуы зорлық-зомбылықты үйреншікті жағдайға айналдырып, тәуекел тобындағы адамдардың, әсіресе жастардың санасын улайды. Айына бір жарым миллион аустралиялық кіретін және жүз мыңдаған адамдық алып топтары бар желінің мұндай жауапсыздығы кешірілмес қателік екенін ол қадап айтты.

Дегенмен, Telegram өкілдері қол қусырып қарап отырмақ емес. Олар бұл айыптауларды үзілді-кесілді жоққа шығарып, шындықты сот залында дәлелдеуге бекініп отыр. Компания басшылығы өздерінің лаңкестікке қарсы белсенді күресіп жатқанын алға тартып, тек биылдың өзінде қауіпті топтардың 150 мыңнан астамының көзін жойғанын алға тартуда.

Айта кетейік, Аустралия билігі мен Павел Дуровтың жобасы арасындағы бұл бірінші қақтығыс емес. Осыған дейін де платформаға балаларға қауіпті ақпаратқа дер кезінде тосқауыл қоя алмағаны үшін миллион долларға жуық айыппұл салынған болатын.