Адам күлкісінің құпиясы ашылды: Біздің күлкіміз маймылдардан қалған ба?
Біз неге қарқылдап күлеміз? Жауабы 15 миллион жыл бұрынғы маймылдарда жатыр.
Халықаралық ғалымдар тобы адамдар мен адам тәрізді маймылдардың күлкісіндегі бірдей ерекшелік шамамен 15 миллион жыл бойы сақталып қалған деген қорытындыға келді. Report агенттігінің хабарлауынша, зерттеу нәтижелері Communications Biology журналында жарияланған.
Зерттеу барысында ғалымдар төрт орангутан, үш бонобо, екі горилла және төрт шимпанзені қытықтап, олардың реакциясын жазып алған. Талдау көрсеткендей, барлық адам тәрізді маймылдардың күлкісінде изохронды ырғақ бар, яғни дыбыс импульстері шамамен бірдей уақыт аралығында қайталанады.
Ғалымдардың айтуынша, адамның күлкісіне де дәл осындай ырғақты құрылым тән. Аталған ерекшелік осыдан 15 миллион жыл бұрын өмір сүрген адамдар мен қазіргі адам тәрізді маймылдардың ең соңғы ортақ арғы атасында пайда болғанын көрсетеді.
Зерттеу авторлары басқа приматтарға қарағанда, адам баласы жағдайға байланысты күлкінің қарқыны мен сипатын (жай жымиып қоя салудан бастап, қарқылдап күлуге немесе тіпті әдейі қолдан күлуге дейін) өзгерте алатынын атап өтті. Ал маймылдарда мұндай икемділік мүлдем жоқ.
Зерттеушілердің пікірінше, күлкіні басқару және өзгерту қабілетінің дамуы адамның сөйлеу қабілетінің пайда болуына түрткі болған эволюциялық кезеңдердің бірі болуы мүмкін. Себебі екі құбылыс та дауыс сигналдарын нәзік басқаруға негізделген.
Сонымен қатар, мамандар неандертальдықтар сияқты жойылып кеткен адам түрлері қазіргі шимпанзелерге қарағанда түрліше күлгенімен, бұл жағынан қазіргі адамдарға жете алмаған деп санайды. Осылайша, ғалымдар адам күлкісінің шығу тегін маймылдардың ортақ арғы атасымен тікелей байланыстырып отыр.
Пікірлер
Әзірге пікір жоқ. Алғашқы пікірді қалдырыңыз!
