Жасанды интеллект полицияға көмекке келді: Алматы облысындағы жаңа жүйенің нәтижесі

Алматы облысында «Сергек» жүйесі іске қосылғалы жол апатынан көз жұматындар қатары екі есеге қысқарды. Полиция мен жоба авторлары бірыңғай цифрлық инфрақұрылымның бір жылдық жұмысын қорытындылап, негізгі нәтижелерді жариялады. Өткен жылдың қыркүйегінен бері өңірдің он ауданында үш жүз жиырма бестен астам интеллектуалды кешен мен тоғыз мыңнан астам бейнекамера орнатылып, толыққанды жұмыс істеп тұр.

Бұл құрылғылар тек стационарлық емес, мобильді түрде де қызмет етеді. Мәселен, патрульдік көліктер жолдағы ережені бұзғандарды бірден тіркейтін арнайы мобильді кешендермен жабдықталған. Нәтижесінде жол-көлік оқиғаларынан қаза тапқандар 47,6 пайызға, ал зардап шеккендер 31,8 пайызға азайды. Оған қоса, арнайы қосымшаның көмегімен жол ережесін елемеген тоқсан төрт мыңнан астам жүргізуші тоқтатылып, биыл жылдың басынан бері бейнебақылау арқылы мыңға жуық қылмыс ізі суымай ашылды. Тұрғындар қауіпсіздігі үшін халық көп шоғырланатын жерлерде шұғыл көмек шақыруға арналған «дабыл түймелері» де іске қосылды.

Облыстық Полиция департаментінің өкілі Ернар Сайдильдиннің айтуынша, басты мақсат — адам өмірін сақтау. Технологиялар жағдайды нақты уақыт режимінде бақылап, оқиғаларға жедел әрекет етуге мүмкіндік береді. Ал облыстық Цифрлық технологиялар басқармасы жобаны жай ғана бейнебақылау емес, жасанды интеллектке негізделген терең талдау жүйесі деп бағалады. Бұл келешектегі «ақылды өңір» тұжырымдамасының берік іргетасы болмақ.

Жүйеге енгізілген жаңа технологиялардың тиімділігі туралы Sergek Group басшысы Евгений Ким де атап өтті. Енді операторларға бейнемұрағатты сағаттап қолмен қараудың қажеті жоқ. Жүйеге «ақ түсті Toyota көлігін тап» деген бұйрық берілсе болғаны, алгоритм қажетті көлікті өзі іздеп табады. Бұл полиция жұмысын барынша жеңілдетіп, қауіпті қылмыскерлерді тез ұстауға және кез келген оқиғаға дереу әрекет етуге жол ашады.