Ғалымдар көзді тоқпен түзетудің революциялық әдісін тапты
Бүкіл процесс шамамен бір минутты алады және ешқандай кесуді немесе тін талшықтарын жоюды қажет етпейді. «Бұл әдіс кездейсоқ ашылды. Мен тірі тіндерді икемді материал ретінде зерттеп жүріп, бұл үрдісті байқап қалдым», — дейді хирург Брайан Вонг.
Лазерсіз, скальпельсіз және ешқандай ауырсынусыз көру қабілетін бір-ақ минут ішінде түзетуге болатынын елестетіп көрші. Ғалымдар әлсіз электр тогы мен уақытша қышқылдық (pH) ауытқымасы арқылы көздің мүйізгек қабығының пішінін өзгертетін мүлде жаңа әдісті ойлап тапты. Алғашқы сынақтар дәстүрлі отасыз-ақ жақыннан көрмеушілік ақауын қалпына келтіруге болатынын көрсетті. Бұл — осы салада LASIK пайда болғаннан бергі ең үлкен революциялық жаңалық болуы мүмкін.
Электромеханикалық пішінін өзгерту (electromechanical reshaping — EMR) деп аталатын технологияны Occidental колледжі мен Калифорния университетінің (Ирвайн) зерттеушілері Америка химиялық қоғамының күзгі отырысында таныстырды.
Көзілдірік пен линзадан құтылғысы келетіндер үшін басты шешім көбіне LASIK отасы болып келгені белгілі. Өз кезегінде ол лазер көмегімен көздің жұқа қабатын кесіп, пішінін түзетеді. Нәтижесі жақсы болғанымен, бұл өте қымбат әрі көздің табиғи құрылымын зақымдайтын ота. «LASIK — бұл жай ғана дәстүрлі хирургияның заманауи түрі. Мұнда да тін кесіледі, тек скальпельдің орнына лазер қолданылады», — дейді зерттеу жетекшісі, профессор Майкл Хилл.
Ғалымдар тобы тінді кесіп тастамай, көздің ішкі құрамымен жұмыс істеуді ұсынды. Негізінен коллагеннен тұратын мүйізгек қабық зарядталған молекулалар мен ақуыздардың арқасында өз пішінін сақтайды. Ал арнайы платина «байланыс линзасы» арқылы әлсіз тоқ өткізгенде, тіннің қышқылдығы өзгереді:
Тоқ берілген сәтте тін икемді материалға айналып, арнайы формаға түседі.
Тоқ өшіп, қышқылдық қалыпты жағдайға оралғанда, қабық қайтадан қатайып, жаңа пішінді мықты бекітеді.
Бүкіл процесс шамамен бір минутты алады және ешқандай кесуді қажет етпейді. «Бұл әдіс кездейсоқ ашылды. Мен тірі тіндерді икемді материал ретінде зерттеп жүріп, бұл үрдісті байқап қалдым», — дейді хирург Брайан Вонг.
Сынақ барысында ғалымдар бұл әдісті 12 қоянның көзіне қолданып, оның 10-ының пішінін сәтті өзгерткен. Ешқандай тілік, лазер немесе жарақат тіркелген жоқ. Әрине, бұл әдіс әлі де бастапқы сатыда және алда жануарлар мен адамдарға жасалатын клиникалық зерттеулер күтіп тұр. Дегенмен, ғалымдардың айтуынша, егер жоба сәтті аяқталса, бұл технология әлдеқайда арзан, қауіпсіз және тіпті қайтымды болады.
Пікірлер
Әзірге пікір жоқ. Алғашқы пікірді қалдырыңыз!
