Төбелес, кептеліс, іздеудегі көлік: Sergek-тің жаңа жүйесі полицияға ақпаратты санаулы секундта жеткізеді
Көліктің нөмірін жасырсаңыз да, бетперде кисеңіз де бәрібір құтылмайсыз! Алматы облысында 9 мыңнан астам камераны бір орталыққа бағындырған «Sergek» жүйесі енді адам ойына келмейтін әдістермен жұмыс істей бастады.
Алматы облысында қылмыскерлердің ізіне түсуде жасанды интеллект тәртіп сақшыларының ең сенімді серігіне айналды. Бүгінде аймақта заманауи технологияның көмегімен ашылған қылмыстар саны екі еседен астам артқан. Тергеуі аяқталған әрбір үшінші қылмыстық істе бейнебақылау жазбалары бұлтартпас айғақ ретінде қолданылып отыр.
Бұл туралы Астанада өткен «Kazakhstan Prevention Days – Astana 2026» көрмесінде Алматы облысының әкімдігі мен Sergek Group компаниясының өкілдері мәлімдеді. Елорда төріндегі жиында отандық мамандар құқық бұзушылықтың алдын алуға бағытталған тың жобаларын таныстырды.
Sergek Group компаниясының өңірдегі жоба жетекшісі Евгений Даниловтың айтуынша, бүгінде облыс аумағында 325 «Sergek 4.0» кешені, 10 мобильді «Sergek Patrol Box» құрылғысы және 9 мыңнан астам бейнекамера бірыңғай экожүйеге тоғыстырылған. Оның екі жарым мыңнан астамы халық көп жиналатын қоғамдық орындардың тыныштығын күзетеді.
Осынау мыңдаған камерадан толассыз ағылған ақпаратты «Sergek AI Platform» жүйесі сүзгіден өткізіп, полицияның жұмысын едәуір жеңілдетіп отыр. Ақылды жүйе іздеудегі адамды сыртқы киімі мен түр-әлпеті арқылы танып қана қоймай, кез келген көліктің маркасын, түсі мен нөмірін жазбай ажыратады. Тіпті көшедегі төбелес, адамдардың әдеттен тыс шоғырлануы немесе тыйым салынған аумаққа бөгде біреудің кіруі сияқты оқыс жағдайларды да қалт жібермейді. Жиналған деректер сол мезетте жедел басқару орталығына жолданып, тәртіп сақшыларының оқиға орнына дереу жетуіне мүмкіндік береді.
Жасанды зерденің шарапаты жол қауіпсіздігінде де айқын сезілуде. Мәселен, 2026 жылдың алғашқы тоғыз айында өңір жолдарындағы апаттан қаза тапқандар саны былтырғымен салыстырғанда 30 пайызға жуық азайған. Өткен жылы осы уақыт ішінде тілсіз жаудай жалмаған жол апатынан 275 адам көз жұмса, биыл бұл көрсеткіш 194-ке дейін төмендеді.
Мұндай оң нәтижеге жүйенің қауіпті алдын ала болжай алу қабілеті де септігін тигізіп отыр. Платформа бұрын болған жол апаттарын, көлік ағынын, ауа райының құбылуын және күнтізбедегі мерекелік не демалыс күндерін өзара салыстыра отырып талдайды. Соның негізінде қай жол бөлігінде апат қаупі жоғары екенін дөп басып анықтап, патрульдік экипаждарды қай маңға қою тиімді екенін ұсынады. Осылайша, қазақстандық мамандар әзірлеген озық технология салдармен күресіп қана қоймай, қайғылы жағдайлардың алдын алуға да жол ашып отыр.
Пікірлер
Әзірге пікір жоқ. Алғашқы пікірді қалдырыңыз!
