Google фейктерді анықтайтын жаңа құралын таныстырды

Жасанды интеллект өмірімізге дендеп еніп, шығармашылық көкжиегімізді кеңейтіп, еңбек өнімділігін еселеп жатыр. Дегенмен, технология қарыштаған сайын жаңа бір мәселе туындады: қазіргі таңда адам қолынан шыққан дүние мен нейрожелі жасаған контентті бір-бірінен ажырату мүлдем мүмкін болмай қалды. Дәл осы түйткілді шешу үшін Google компаниясы SynthID технологиясын ұсынып отыр.

Жүйе жасанды интеллект арқылы жасалған сурет, аудио, мәтін немесе бейнежазбаларға көзге көрінбейтін цифрлық сутаңба орнатады. Ол генеративті нейрожелінің барлық өнімдеріне біріктірілген. Ең басты ерекшелігі – бұл белгілерді адам көзімен көріп, құлақпен есту мүмкін емес, оны тек SynthID технологиясы ғана тани алады.

Жүйе контент жасалған сәтте-ақ оған жасырын цифрлық таңба басады. Ол суреттің немесе видеоның сапасына, мөлдірлігіне ешқандай нұқсан келтірмейді. Тіпті қулығын асырғысы келгендер суретті кесіп, түрлі фильтрлер қосса да, кадр жиілігін өзгертсе немесе файл көлемін кішірейтсе де, әлгі таңба жойылмайды. Жүйе оны кез келген жағдайда тауып алады.

Егер сіз алдыңызға келген суреттің немесе видеоның Google нейрожелісі арқылы жасалғанын тексергіңіз келсе, бұл да қиын емес. Ол үшін 2025 жылы SynthID Detector арнайы тексеру порталы іске қосылған болатын. Бастапқыда бұл жүйені тек журналистер мен медиа мамандары ғана сынақтан өткізіп, өз бағасын берген еді. Енді мамандардың пікірі ескеріліп, бұл құрал жалпы көпшіліктің қолданысына толықтай беріліп отыр.