Жас физиктер Колумбияда әлемді мойындатты: Тарихтағы алғашқы 100% алтын

Қазақстан ұлттық құрамасы физикадан ең беделді халықаралық білім додасында бұрын-соңды болмаған сенгісіз рекорд орнатты - деп жатыр, ҚР Оқу-ағарту министрлігі

4-12 шілде аралығында Колумбияның Букараманга қаласында өткен 56-шы Халықаралық физика олимпиадасында (IPhO) еліміздің намысын қорғаған 5 оқушының бесеуі де алтын медальмен оралды.

Биылғы зияткерлік майданға әлемнің 85 елінен ең мықты деген 381 дарынды оқушы жиналды. Қатысушылар аса күрделі теориялық және эксперименттік есептерді шешіп, ми қайнатарлық тапсырмалармен алысты. Біздің жас физиктер барлық сынақтан сүрінбей өтіп, Қазақстанның олимпиада тарихындағы ең жоғары, абсолютті нәтижеге қол жеткізді.

Әлемді бағындырған данышпандар:

• Нұргүл Егенбергенова – Астана қаласындағы NURORDA мектеп-лицейінің 11-сынып оқушысы;

• Амирбек Азатбеков – Астана қаласындағы ХББ NIS-тің 12-сынып оқушысы;

• Илияс Қазымбек – Астана қаласындағы Spectrum International School мектебінің 12-сынып оқушысы;

• Роман Черемнов – Алматы қаласындағы «Мирас» халықаралық мектебінің 12-сынып оқушысы;

• Дамир Құрман – Астана қаласындағы ХББ NIS-тің 11-сынып оқушысы.

Бұлар кездейсоқ емес, 3 жыл бойы тоқтаусыз төгілген тер мен қажырлы еңбектің жемісі. Ұлттық құраманы тарихи жеңіске ҚазҰУ-дың аға оқытушысы, PhD докторы Гүлия Нұрбақова бастаған мықты мамандар дайындады. Ал Колумбиядағы додада SDU аға оқытушысы Самат Мақсұтов пен халықаралық олимпиадалардың жүлдегері Алишер Еркебаев балаларға тірек болып, процесті мінсіз үйлестірді.

1967 жылдан бері өтіп келе жатқан бұл олимпиадаға Қазақстан 1997 жылдан бері қатысады. Былтыр ғана біздің құрама 2 күміс, 3 қола алған болса, биылғы секіріс – нағыз феномен!