Жаңа iPhone 18 Pro мен Pro Max Қазақстанда қаншадан сатылуы мүмкін?

Apple компаниясы 9 қыркүйекте жаңа өнімдерінің тұсаукесерін өткізеді. Reuters агенттігінің мәліметінше, шара барысында кезекті iPhone топтамасы мен компания тарихындағы алғашқы жиналмалы смартфон көрсетілуі мүмкін.

Күздегі таныстырылым Apple-дің жаңа бас директоры Джон Тернустың тікелей басшылығымен өтетін алғашқы үлкен жиын. Ол компания тізгінін 1 қыркүйекте қолына алады, ал Тим Кук атқарушы төраға қызметіне ауысады. Тернус көп жыл бойы Apple-дің аппараттық қамтамасыз ету (hardware) бағытын басқарған. Сарапшылар оның аталған қызметке тағайындалуын компанияның негізгі миссиясы — құрылғылар жасауға барынша ден қоятынының белгісі деп бағалап отыр.

Сарапшылардың болжамынша, алғашқы жиналмалы iPhone Ultra экранының көлемі iPad mini дисплейімен қарайлас болуы ықтимал. Премиум гаджеттің бағасы шамамен 2 000 – 2 500 доллардан (917 мыңнан 1,15 млн теңгеге дейін) басталады деп күтіліп отыр.

Жаңа құрылғыны нарыққа шығару — Apple үшін стратегиялық қадам. Компания осы арқылы өнімдерінің орташа құны мен табысын арттыруды көздейді. Қазір жиналмалы гаджеттер нарығында Samsung Electronics көш бастап тұр. Оңтүстіккореялық алпауыт шілде айында бәсекелес ретінде төлқұжат көлеміндей жаңа жиналмалы телефонын таныстырып, өз позициясын бекіте түскен еді. Дегенмен, IDC зерттеу компаниясы 2027 жылға қарай Apple 17 миллионнан астам жиналмалы iPhone сата алады деген болжам жасады.

iPhone 18 Pro және Pro Max

Жиналмалы смартфоннан бөлек, көрермен назарына iPhone 18 Pro мен iPhone 18 Pro Max ұсынылмақ. Жаңа модельдер өте қуатты процессормен, жаңартылған камерамен және ұзаққа шыдайтын батареямен жабдықталады. The Verge басылымының мәліметінше, алдағы таныстырылым тек премиум сегменттегі смартфондарға арналуы мүмкін. Базалық iPhone 18, iPhone 18e және екінші буындағы iPhone Air тек 2027 жылы шығады деп болжанып отыр.

Құрылғы бөлшектерінің, әсіресе жад чиптері бағасының өсуіне байланысты Apple өз өнімдерін айтарлықтай қымбаттатуы мүмкін:

• iPhone 18 Pro — 1 199 доллардан (шамамен 550 мың теңге);

• iPhone 18 Pro Max — 1 299 доллардан (шамамен 596 мың теңге).

Көрсетілген сома — АҚШ-тағы салықты есепке алмағандағы 256 ГБ базалық нұсқалардың болжамды құны. Қазақстанда сатылымға шыққан кезде олар тиісінше шамамен 650–750 мың және 700–800 мың теңге төңірегінде саудалануы ықтимал. Нақты баға тек таныстырылым кезінде ғана белгілі болады.

Электроника өндірушілері жад чиптері мен жинақтауыштардың жетіспеушілігін әлі де сезініп отыр. Тапшылық тауардың өзіндік құнының өсуіне әкеліп соғуда. Apple қазірдің өзінде Mac пен iPad-тың кейбір модельдерінің бағасын өсіруге мәжбүр болды. Шілде айында компания жеткізу тізбегіндегі «айтарлықтай қиындықтар» туралы ескерткен болатын, сәйкесінше жағдай алдағы сатылым көрсеткіштеріне кері әсер етуі мүмкін.