Томиристің орнын Аққу басты: «Әлем Аруы 2026» байқауындағы басты сенсация
Дәл осы күні Алматы төрінде сұлулық әлемін дүр сілкіндіретін ресми баспасөз конференциясы өтеді. «Қазақстан Аруы 2024» титулының иегері Бағым Балтабаева өзінің 73-ші халықаралық «Әлем Аруы 2026» байқауына дайындығын жария етеді. Кездесу барысында тек қана ұлттық костюм емес, Қазақстанның жаһандық сахнадағы мүлдем жаңа мәдени миссиясы таныстырылмақ. Бұл жиын — аруымыздың үлкен сапар алдындағы ең маңызды қадамы.
Алматы қаласында 2026 жылдың 5 тамызында «Қазақстан Аруы 2024» титулының иегері Бағым Балтабаеваның 73-ші халықаралық «Әлем Аруы 2026» байқауына қатысуына арналған ресми баспасөз конференциясы өтеді. Жиын барысында Қазақстан атынан қатысушының ұлттық костюмі, байқау тұжырымдамасы және еліміздің халықаралық аренада таныстырылатын мәдени миссиясы жайлы егжей-тегжейлі айтылады.
Биылғы «Әлем Аруы» байқауының құрылғанына тура 75 жыл толып отыр. Тарихи мәні зор мерейтойлық маусым алғаш рет Вьетнам жерінде ұйымдастырылмақ. Дүбірлі додаға әлемнің 130-ға жуық елі мен аумағынан келген өкілдер қатысып, өз мемлекеттерінің мәдениетін, ұлттық құндылықтарын және әлеуметтік бастамаларын әйгілі «Мақсаты бар сұлулық» философиясы аясында паш етеді. Отандық аруымыз 7 тамыз күні Вьетнамға аттанып, бір ай бойы түрлі халықаралық мәдени іс-шараларға қатысады. Оның елге оралуы 7 қыркүйекке жоспарланған.
Қазақстанның намысын қорғайтын Бағым Балтабаева – Өскемен қаласының тумасы. Ол Сәрсен Аманжолов атындағы Шығыс Қазақстан университетін «Бастауыш білім беру педагогы» мамандығы бойынша тәмамдаған. Сұлулық пен сән әлеміндегі жетістіктерімен қатар, бойжеткен педагогика саласындағы ғылыми олимпиадалардың жүлдегері атанып, университет ректоры мен Шығыс Қазақстан облысы әкімінің алғыс хаттарымен марапатталған. Оның терең білімі мен қоғамдық белсенділігі байқаудың негізгі талаптарына толықтай жауап береді.
Жарыстың ең маңызды әрі көрермен асыға күтетін кезеңдерінің бірі – ұлттық костюмді таныстыру. Биыл Қазақстан қазақ әйелінің бейнесін сұлулық, рухани күш және ішкі үйлесім символдары арқылы ашатын ерекше тұжырымдама ұсынбақ. Осы уақытқа дейін қазақ әйелдері көбіне қайсар жауынгер Томирис бейнесі арқылы танылып келсе, ендігі кезекте әлем назарына қазақ қызының нәзіктігі мен даналығы ұсынылады.
Бағым Балтабаеваның айтуынша, ұлттық костюмнің негізіне тазалықтың, адалдықтың және рухани күштің белгісі саналатын аққу бейнесі алынған. Аққу сондай-ақ Қазақстанның табиғи және мәдени мұрасының ажырамас бөлігі саналатын Каспий теңізімен тікелей байланысты. Осындай ерекше образ арқылы қазақ әйелінің талғампаздығын, асқақтығын және бай ішкі әлемін жеткізу көзделіп отыр.
Пікірлер
Әзірге пікір жоқ. Алғашқы пікірді қалдырыңыз!
