«Тенге» тарих қойнауына кетеді: Қазақстандықтардың ақшасы енді қалай жазылады?

2026 жылдың 1 шілдесінен бастап Қазақстанның барлық ресми құжаттарында ұлттық валютамыздың атауы орысшаланған «тенге» нұсқасынан арылып, төл әрпімізбен «теңге» деп жазылатын болады. Arasha.kz басылымының Tengrinews.kz-ке сілтеме жасай отырып хабарлауынша, бұл тарихи қадам жаңартылған Конституцияның күшіне енуімен тікелей байланысты.

Әділет министрлігі бұдан былай мемлекеттік органдар барлық қаулы-қарар мен ресми құжаттарда тек қана «теңге» сөзін қолдануға міндетті екенін кесіп айтты. Қазірдің өзінде заңнаманы жаңа талапқа сай ретке келтіру жұмыстары қызу жүріп жатыр.

Әлбетте, мұны естіген қарапайым халықтың көкейінде «Ақша ауысайын деп жатыр ма? Дефолт бола ма?» деген үрейлі сұрақ тууы заңды. Мамандар көпшілікті сабырға шақырады: бұл ешқандай да ақша реформасы емес, бар-жоғы Ата Заңдағы атауға сәйкестендірілген редакциялық түзету ғана. Яғни, қалтаңыздағы қаражаттың құны түспейді, ескі банкноттар жарамсыз болып қалмайды және төлем жүйелері бұрынғыша қалыпты жұмыс істей береді.

Тағы бір қуантарлық жаңалық – бұған дейін «тенге» деп жазылып, екі тарап қол қойған келісімшарттар мен құжаттарды қайта рәсімдеп әуре болудың қажеті жоқ. Олардың заңды күші толық сақталады. Тек жаңадан қабылданатын заңдар мен жасалатын келісімдерде міндетті түрде «теңге» нұсқасы тайға таңба басқандай жазылуы тиіс.

Бас банк те қарап қалмай, өз ішіндегі нормативтік актілер мен төлем құжаттарын жаңаша жазуға көшіп жатқанын мәлімдеді. Алдағы уақытта Ұлттық банктің барлық ресми хабарламаларында қазақы «ң» әрпі жарқырап тұратын болады.

Дегенмен, бір түйткілді мәселе әлі ашық күйінде қалып отыр. БАҚ, жекеменшік компаниялар, дүкендердегі баға көрсеткіштері, оқулықтар мен жарнама тақталарында бұл сөз қалай жазылуы керек? Бұған қатысты нақты бұйрық жоқ. Жұрт енді Ғылым және жоғары білім министрлігінен түпкілікті нүктесін қоятын ресми түсініктемені күтіп отыр.