Синоптиктер 14 шілдені Астанадағы ең ыстық күн дейді
Ертең Астанада жаздың ең ыстық күні тіркеліп, көпжылдық температуралық рекорд жаңарайын деп тұр!
«Қазгидромет» мамандары елорда тұрғындарын алдағы аптап ыстыққа байланысты ескертті. Синоптиктердің болжамынша, 14 шілде Астанада жаздың ең қапырық күні болады, деп хабарлайды Tengrinews.kz тілшісі.
Метеорологтардың мәліметінше, 14 шілде күні Астанада ауа температурасы +37...+39 градусқа дейін көтеріледі. Көпжылдық бақылау нәтижелері бойынша дәл осы күннің абсолютті максимумы 1992 жылы тіркеліп, +35,3 градусты көрсеткен еді. Демек, 32 жыл бұрынғы тарихи рекорд жаңаруы әбден мүмкін.
Тіпті 13 шілденің өзінде қаладағы ыстық тарихи көрсеткіштерге жақындады. Күндізгі сағат 13:40-та термометр бағаны +35,9 градусқа жеткен. Ал бұл күннің бұған дейінгі ең жоғарғы температурасы сонау 1935 жылы байқалып, +39,5 градусты құраған болатын.
Еске салсақ, биылғы 23 маусымда да Астанада ауа +36,8 градусқа дейін ысып, жаңа рекорд орнатқан еді. Бұған дейінгі ең жоғарғы көрсеткіш 1941 жылы (+36,4 градус) тіркелген.
Салқын ауа райы қашан келеді?
«Қазгидромет» мамандары алдағы күндері Қазақстан аумағында ауа райы өте құбылмалы болатынын атап өтті. 15-16 шілдеде еліміздің солтүстігінде жаңбыр жауып, найзағай ойнайды, сондай-ақ ауа температурасы +25...+30 градусқа дейін төмендейді. Ал оңтүстік өңірлерде керісінше, +40...+45 градусқа жететін төтенше ыстық сақталады.
Пікірлер
Әзірге пікір жоқ. Алғашқы пікірді қалдырыңыз!
