«Sergek» Ақтаудағы туристік ағынды есептеді: Қалаға ең көп көлік қай өңірден келеді?

Каспий жағалауындағы шомылу маусымы басталғанда, Ақтау қаласының тыныс-тіршілігі күрт өзгереді. Sergek Group сарапшылары 2025 жылғы тамыз бен 2026 жылғы шілде аралығындағы анонимді деректерге талдау жасап, қаладағы көлік қозғалысына қатысты өте қызық статистиканы жариялады.

Нәтижесінде Ақтаудың тек туристік қана емес, нағыз көліктер ағылатын орталыққа айналатыны белгілі болды.

Sergek ITS интеллектуалды жүйесінің мәліметінше, жаз айларында Ақтаудың курорттық аймағына бет алатын көліктердің саны қыспен салыстырғанда бірден бес есеге өседі. Егер қыста теңіз жағасына тәулігіне 1,2 мың көлік барса, жазда бұл көрсеткіш 6,3 мыңға дейін жетеді. Ал нағыз қарқын демалыс күндері басталады: сенбі-жексенбіде демалыс орындарына күніне 12,2 мыңға жуық автокөлік қатынайды. Бұл жұмыс күндерімен салыстырғанда екі есе көп.

Жалпы алғанда, жаз – Ақтау жолдары үшін ең «ыстық» кезең. Осы уақытта қала көшелеріне күн сайын шамамен 84 мың бірегей көлік шығады (салыстыру үшін: қаңтарда бұл сан 77 мыңға дейін, ал орташа қысқы көрсеткіш 79 мыңға дейін азаяды).

Мұнымен қоса, қозғалыс ауқымы да кеңейе түседі:

• Тәуліктік сапарлар саны 14%-ға артып, орта есеппен 231 мыңға жетеді.

• Көліктердің бір күнде жүріп өтетін жалпы қашықтығы 2,55 миллион шақырымды құрайды. Бұл қысқы уақытпен салыстырғанда жарты миллион шақырымға артық!

Жылдың басқа мезгілінде көшедегі қозғалыс кешкі сағат 19:00-де шарықтау шегіне жетсе, жазда бұл үрдіс өзгереді. Күн салқындай бастағанда жұрттың бәрі жағалауға ағылатындықтан, кептелістің ең жоғары шегі кешкі сағат 21:00-ге қарай ауысады.

Жаз мезгілінде Ақтау көшелеріндегі әрбір оныншы көлік басқа аймақтан келген туристерге тиесілі. Sergek Group компаниясының CEO-сы Евгений Ким бұл үрдісті былай түсіндірді:

«Ең үлкен өсім көршілес батыс өңірлерінен байқалады. Мәселен, Атырау облысынан келетін көліктер – 70%-ға, Ақтөбеден – 44%-ға, ал Батыс Қазақстан облысынан 30%-ға көбейген. Сондай-ақ, Ресей нөмірімен тіркелген көліктер санының 21%-ға өскенін байқадық. Бұл Ақтаудың, ең алдымен, көршілес өңірлердің тұрғындары үшін жазғы демалыстың басты бағыттарының біріне айналғанын айқын көрсетеді».

Бір қуантарлығы, туристер қанша көп болғанымен, қаланың негізгі магистральдарындағы қозғалыс қарқындылығы маусымға қарамастан небәрі 10% шегінде ғана құбылады. Яғни, қаладағы басты көлік жүктемесі тікелей курорттық аймақтарға апаратын жолдарға түседі.