Секундтар шешкен тағдыр: Арнайы жасақ қызметкері жас жігітке екінші өмір сыйлады

13 шілде күні Алакөл жағалауындағы танымал демалыс орындарының бірінің маңында аумақты бақылап жүрген арнайы жасақ қызметкерлері кенеттен есінен танып, құлап түскен жас жігітті байқаған. Бұл туралы Абай облыстық полиция департаментіне сілтеме жасаған Kazinform агенттігі хабарлайды.

Полиция мәліметінше, жігіттің жағдайы күрт нашарлап, тыныс алуы қиындаған. Мұндай сәтте әрбір секунд санаулы еді.

— Еш уақыт жоғалтпастан, СОБР (жедел қимылдайтын арнайы жасақ) аға инспекторы, полиция капитаны Асланбек Әбділдинов дереу алғашқы медициналық көмек көрсетіп, жансақтау шараларына кірісті. Дер кезінде жасалған әрекеттің арқасында жігіт қайта демала бастады. Осы сәтте жігіттің тынысы ашылғанын көрген арнайы жасақ жауынгері сезімін жасыра алмай: «Жарайсың, азамат!» – деп қуанышын білдірді, — деп баяндады Абай облыстық полициясы оқиғаның мән-жайын.

Одан кейін полиция капитаны жігітті қырынан жатқызып, жедел жәрдем келгенше қасынан бір елі ұзамай жағдайын бақылап отырды. Ал басқа қызметкерлер дәрігерлер көлігін қарсы алып, оқиға орнына жетудің ең төте жолын көрсеткен. Аман қалған жігіт медицина қызметкерлеріне тапсырылды. Қазір оның жағдайы жақсы, өміріне төніп тұрған ешқандай қауіп жоқ.

— Жас жігіт үшін бұл күн шын мәнінде екінші рет өмірге келген күнмен тең. Ал жанынан табылған арнайы жасақ жауынгері үшін бұл – кәсіби дайындық, батылдық пен адам тағдырына бейжай қарамаудың арқасында өмірді арашалап қалған ерекше сәт, — деп атап өтті Абай облыстық полиция департаменті.

Еске сала кетейік, бұған дейін Алакөлде жоғалған балаларды жасанды интеллекттің көмегімен іздей бастағаны хабарланған болатын.