Отандық нарыққа жаңа ойыншы келді: GAC автозауыты бізге не береді?
Арнайы кездесу барысында Қазақстан аумағында жаңа автокөлік зауытын салу мәселесі ресми түрде бекітілді.
Қазақстанның автоөнеркәсіп саласы тағы бір ірі халықаралық жобамен толыққалы отыр. Жақында Қытайда өткен «Жазғы Давос» дүниежүзілік экономикалық форумының 17-ші жыл сайынғы кездесуі аясында еліміз үшін стратегиялық маңызы бар келісімге қол жеткізілді. ҚР Премьер-министрі Олжас Бектенов пен «Guangzhou Automobile Group» (GAC) директорлар кеңесінің төрағасы Фэн Синьяның арнайы кездесуі барысында Қазақстан аумағында жаңа автокөлік зауытын салу мәселесі ресми түрде бекітілді.
Жаңа өндіріс орнының жоспары ауқымды әрі нақты қадамдарды көздейді. Алдын ала бекітілген жобаға сәйкес, 2026-2028 жылдар аралығында отандық зауыт конвейерінен 17 мың су жаңа автокөлік шығару көзделіп отыр. Ең бастысы, жаңа өндіріс желісі тек дәстүрлі іштен жану қозғалтқыштары бар машиналарды ғана емес, сонымен қатар заманауи трендке сай келетін гибридті күштік қондырғылары бар модельдерді де қамтитын болады. Бұл қазақстандық тұтынушылар үшін таңдау аясын кеңейтіп, жанармайды үнемдейтін әрі экологияға зияны аз көліктердің қолжетімділігін арттырады.
Айта кетерлігі, GAC (Guangzhou Automobile Group) компаниясы – жай ғана көлік құрастырушы емес, әлемдік нарықта өзіндік орны бар алпауыт корпорация. Ол әлемдегі табысы ең жоғары әрі ықпалды компаниялардың тізімін түзететін беделді Fortune Global 500 рейтингіне кіретін Қытайдың ірі автомобиль өндірушісі болып табылады. Мұндай ірі инвестордың Қазақстан нарығына келуі отандық машина жасау саласына жаңа технологиялар әкеліп қана қоймай, экономикамыздың одан әрі өркендеуіне үлкен серпін беретіні сөзсіз.
