Oracle нейрожелілер үшін неге 21 мыңнан астам маманын құрбан етті?

Oracle корпорациясы қызметкерлерін жаппай жұмыстан босатудың жаңа толқынын бастады. Басшылықтың күтпеген хабарламасын алған мамандар бір-ақ күнде далада қалды. Business Insider басылымына жеткен ішкі хаттарда "Ұйымдық өзгерістерге байланысты қызметіңіз қысқарды, бүгін – соңғы жұмыс күніңіз" деген қатаң үкім жазылған. Жұмыссыз қалғандарға төрт апталық базалық жалақы және компанияға сіңірген әр жылы үшін қосымша бір аптаның ақысы беріледі.

Қатаң шешімнің астарында жасанды интеллект инфрақұрылымын дамытуға жұмсалатын қыруар шығын жатыр. Корпорация жаңа деректер орталықтарын салу үшін ондаған миллиард доллар қарыз алған. Бірінші тоқсандағы күрделі шығындар 28,5 миллиард долларға жетті. Салыстыру үшін айтсақ, былтырғы көрсеткіш 8,5 миллиард доллар төңірегінде болған еді. Ендігі жоспар бойынша 2027 қаржы жылына қарай шығын көлемі 90-95 миллиард долларға дейін шарықтамақ.

Жасанды интеллектке тігілген бәс өзін ақтай ма, жоқ па – Уолл-стрит сарапшылары әзірге күмәнмен қарап отыр. Дегенмен, компанияның бұлтты технологиялар бағытындағы өсімі инвесторларға аздап үміт сыйлайды. Айта кетерлігі, технологиялық алпауыт 2026 жылдың 31 мамырында аяқталған қаржы жылында 21 мың қызметкерімен қоштасып үлгерген еді. Сөйтіп, жалпы штаттың 13 пайызы қысқарды. Қазіргі тазартуға дейін ұйымда 141 мыңға жуық адам еңбек еткен.

Қысқартуға ілінген мамандарға жұмыс компьютеріне, корпоративтік пошта мен файлдарға кіру мүмкіндігі жақын арада бұғатталатыны ескертілді. Басшылық құпия ақпараттарды көшіруге немесе сақтап қалуға қатаң тыйым салып, жұмыстан шығару құжаттарын рәсімдеу үшін жеке пошта мекенжайын шұғыл түрде ұсынуды талап еткен. Адамдардың орнын серверлер мен нейрожелілерге алмастырған технологиялық революцияның қатал шындығы осындай.