Network School Kazakhstan ресми түрде іске қосылды
Бірге тұру, жұмыс істеу, оқу және жаһандық стартаптар жасау – жай ғана мектеп емес, болашақтың нағыз технологиялық экожүйесі. Астанада халықаралық деңгейдегі Network School қауымдастығы жұмысын бастады. Әлемдік жоба неліктен дәл Қазақстанды таңдады?
Қазақстан жаһандық технологиялық қоғамдастықтың бас қосатын жаңа нүктесіне айналды. Астанада әлемнің түкпір-түкпірінен кәсіпкерлерді, инженерлер мен зерттеушілерді біріктіретін халықаралық Network School Kazakhstan жобасы ресми түрде іске қосылды.
Айтулы шара елордадағы Alem.ai халықаралық жасанды интеллект орталығында өтті. Тұсаукесерге ҚР Премьер-Министрінің орынбасары – Жасанды интеллект және цифрлық даму министрі Жаслан Мәдиев, сондай-ақ Astana Hub, «Астана» халықаралық қаржы орталығы, Superteam Kazakhstan өкілдері мен отандық IT қауымдастық қатысты.
Бұл – жай ғана оқу орны емес, тұрмыс, жұмыс, білім мен инновацияны бір арнаға тоғыстырған жаңа форматтағы комьюнити. Мұнда қатысушылар озық жұмыс кеңістіктерін пайдаланып қана қоймай, спорт инфрақұрылымына, білім бағдарламалары мен халықаралық сарапшылар желісіне тікелей қол жеткізеді. Жоба алаңы ірі хакатондар, конференциялар мен ұзақ мерзімді бағдарламалар өткізуге таптырмас орын болмақ. Тіпті, отбасылы мамандар кәсібі мен жеке өмірін еркін ұштастыра алуы үшін арнайы жағдайлар да қарастырылған.
Жобаның негізін қалаушы, Coinbase компаниясының бұрынғы техникалық директоры, Andreessen Horowitz венчурлық қорының бас серіктесі әрі «The Network State» кітабының авторы Баладжи Шринивасан еліміздің әлеуетін жоғары бағалады:
«Қазақстанда мықты инженерлік база, заманауи цифрлық инфрақұрылым және технологиялық кәсіпкерлерге барынша ашық орта қалыптасқан. Біз осы жерден зор мүмкіндік көріп отырмыз әрі Қазақстанмен тығыз ынтымақтастық орнататынымызға сенімдіміз».
Жаңа экожүйе жаһандық трендтер мен қазақстандық таланттар арасындағы алтын көпірге айналады. Бұл отандық мамандар үшін шетелдік сарапшылармен тәжірибе алмасудан бастап, бірлесіп өнім жасау мен жаңа компаниялар құруға дейінгі ауқымды жол ашпақ.
Айта кетейік, жобаның іске қосылуына дейін ҚР Жасанды интеллект және цифрлық даму министрлігі мен Network School арасында инновация және адами капиталды дамыту бағытында арнайы меморандумға қол қойылған болатын.
Болашақта Network School цифрлық экономика мен физикалық инфрақұрылымды біріктіретін жаңа технологиялық қоғамдастықтардың үлгісін сынайтын басты хабқа айналуды көздеп отыр. Бұл қадам Қазақстанның жасанды интеллект пен цифрлық технологияларды дамытудағы стратегиялық бағытын одан әрі нығайта түседі.
Пікірлер
Әзірге пікір жоқ. Алғашқы пікірді қалдырыңыз!
