Миллиондаған лас бөтелке енді полигонға емес, тасжолға төселеді

Жыл сайын миллиондаған тонна пластик полигондарға жөнелтіледі. Соның ішінде күнделікті ішіп жүрген сүттің бос ыдыстары да бар. Техникалық тұрғыдан қайта өңдеуге келгенімен, зауыттар ондай шикізатты қабылдаудан қашады. Себебі, ыдыс түбінде қалған сүт қалдықтары қымбат құрылғыларды қатты ластайды. Алайда Қытай мамандары тығырықтан шығар жол тапты. Олар керексіз пластиктен кәдімгі тасжол төсеп шықты.

Ерекше жоба Жер күніне орай қолға алынды. Dow корпорациясы мен Shiny Meadow бренді бірігіп, Шанхай қаласындағы Шығыс Қытай ғылым және технология университетінің аумағында жаңашыл құрылыс жүргізді. Сюйхуэй кампусындағы жаңа инфрақұрылымға алты мыңнан астам бос сүт құтысы жұмсалды. Өңдеу қиынға соғатын қалдықтар арнайы полимермен байытылған асфальт жабынына айналды.

Материалтану ғылымы дәстүрлі қайта өңдеу жүйелерінің шамасы жетпейтін күрделі мәселені осылайша шешіп берді.

Жаңа әдістің негізгі мәні қарапайым: қажетсіз әрі лас пластикті жинап, жол төсеміне арналған төзімді қоспа жасап шығару. Нәтижесінде асфальттың сапасы артып, ауа райының құбылмалы жағдайларына төзімділігі күшейеді. Екінші жағынан, табиғатқа тасталатын зиянды қалдықтардың көлемі айтарлықтай азаяды.

Dow компаниясының Азия-Тынық мұхиты аймағындағы вице-президенті Бамбанг Чандра аталған бастама өзге де ірі өндірушілерге ой салады деп үміттенеді. Алпауыт корпорациялар қоршаған ортаны қорғаудың балама жолдарын іздесе, ғаламшарды қоқыстан тазарту процесі әлдеқайда жылдам жүретіні анық.