Компьютердің керегі жоқ: Cursor код жазуды смартфонға көшірді

Cursor iPhone-ға арналған нативті қосымшасын шығарды - әзірге ол ашық бета-нұсқа мәртебесінде қолжетімді. Енді код жазатын және оны түзететін жасанды интеллект агенттерін тікелей смартфоннан іске қосып, басқаруға болады: тапсырма бересіз де, қосымшаны жауып тастайсыз. Біраз уақыттан соң дайын пул-реквестке (pull request) ораласыз.

Қосымша екі режимде жұмыс істейді. Біріншісі - бұлттағы агенттерді іске қосу. Олар толыққанды әзірлеу ортасы бар оқшауланған виртуалды машиналарда жұмыс істейді және адамның қатысуынсыз ұзақ уақыт бойы тапсырмаларды орындай береді. Екіншісі — Remote Control функциясы арқылы өз компьютеріңіздегі агентті қашықтан басқару. Бұл үшін баптауларда арнайы опция қарастырылған: ол сіз компьютер алдында болмаған кезде құрылғының ұйқы режиміне өтуіне жол бермейді. Қосымшаның ішінде Cursor-да қолжетімді барлық модельдер бар, сондай-ақ десктоп нұсқасындағыдай дауыспен тапсырма беру және слеш-командалар қосылған.

Агентті іске қосқаннан кейін қосымшаны жауып тастауға болады: Cursor жұмыс барысын құлыптаулы экрандағы Live Activities арқылы көрсетіп отырады. Ал жұмыс аяқталғанда, қосымша ақпарат қажет болғанда немесе код тексеруге (ревью) дайын болғанда пуш-хабарлама жібереді. Телефон арқылы-ақ генерацияланған кодтағы өзгерістерді (диффтерді) және демо-нұсқаларды көруге, пікір қалдыруға және PR-ды қабылдап, біріктіруге (merge) болады. Сонымен қатар, агент сессиясын бұлт пен жергілікті компьютер арасында оңай ауыстыруға мүмкіндік бар. Мәселен, тапсырманы бұлтта аяқтап, кейін оны өз компьютеріңізге жүктеп алып, ортақ базаға қоспас бұрын тексеріп шыға аласыз.

Мобильді қосымша Cursor Compile конференциясындағы үлкен анонстың бір бөлігі болды. Компания сонымен қатар нөлден бастап оқытылған жеке моделін және кодты сақтап, бірлесе әзірлеуге арналған Origin платформасын таныстырды. Бұл жаңалықтардың бәрі SpaceX компаниясының Cursor-ды 60 миллиард долларға сатып алу туралы келісімі аясында өтіп жатыр. Қосымша барлық ақылы тарифтерде қолжетімді, ал 5 шілдеге дейін Cursor мобильді нұсқадағы Composer 2.5 моделін қолдануға 75% жеңілдік ұсынады.