Киік еті өтпей қалды: Үкімет тонналаған етті қайда жібермек?
Миллиондаған теңгенің тауарын далаға тастай алмайтыны анық. Енді Үкімет қоймада тау болып үйіліп қалған етті өткізудің мүлдем күтпеген жолын тапқан сияқты. Жұрт жеуден бас тартқан консервілер енді кімдерге жаппай жеткізілуі мүмкін?
Қазақстанда киік етін өңдейтін кәсіпорындар оны сатуда қиындықтарға тап болды. Ауыл шаруашылығы министрлігі қазіргі таңда бұл өнімді өткізудің бірнеше нұсқасын қарастырып жатқанын мәлімдеді, деп хабарлайды Tengrinews.kz тілшісі.
Ауыл шаруашылығы вице-министрі Азат Сұлтановтың айтуынша, киік еті алғаш сатылымға шыққан кезде сұраныс жоғары болған. Алайда, бұл көбіне тұтынушылардың таңсық дүниеге деген қызығушылығынан ғана туындаған екен.
"Белгілі бір кезеңде дүрбелең сұраныс болып, жұрт консервілерді де қызық көріп сатып алды. Қазір ол қызығушылық басылды, сәйкесінше кәсіпорындар өнімді өткізуде қиындық көріп отыр", – деді вице-министр үкімет кулуарында.
Сұлтановтың сөзінше, қазір Экология және Сауда министрліктерімен бірлесіп өнімді тиімді пайдаланудың түрлі жолдары талқылануда. Қарастырылып отырған негізгі нұсқалардың бірі – өнімді азық-түлікті үлкен көлемде (көтерме бағамен) сатып алатын ірі ұйымдарға жеткізу.
Пікірлер
Әзірге пікір жоқ. Алғашқы пікірді қалдырыңыз!
