Қызыл кітаптағы құсты жеп қойғандар сотталатын болды

Өзбекстанның Сұрхандария облысында табиғат жанашырларының жағасын ұстатқан жағдай болды. Жергілікті тұрғындар Қызыл кітапқа енген екі бірдей қызғылт бірқазанды ұстап алып, тура мағынасында қазанға салған. Бұл туралы өзбекстандық БАҚ-қа сілтеме жасап Report хабарлайды.

Сирек кездесетін қос қанаттыны қорек қылғандардың бұл «ас мәзірі» табиғатқа 206 миллион сум (шамамен 16 мың доллар) шығын келтірді. Енді бұл қымбат түскі астың құқықтық бағасын прокуратура беретін болады. Ең қызығы, тәртіп бұзушылар бұл әрекетін «жай ғана қызығушылықтан» деп ақтап алғысы келіпті. Сірә, Қызыл кітаптағы құстың еті қандай болатынын татып көргісі келсе керек.

Алайда экополиция бұл «қызығушылықтың» кездейсоқ еместігін әшкереледі. Аталған азаматтардың жалпы заңсыз аңшылықпен тұрақты түрде айналысып жүргені белгілі болды. Тексеріс кезінде олардан аңшылық мылтық табылып, Ішкі істер министрлігінің қызметкерлері оны тәркілеп алды. Енді оларға торғай атудың өзі арман болмақ.

Экология министрлігінің мәліметінше, қызғылт бірқазан – саны азайып, жойылып бара жатқан осал түрлердің бірі. Ол тек Өзбекстанның ғана емес, Халықаралық табиғатты қорғау одағының (МСОП) Қызыл тізіміне де енгізілген. Бұл құстар Оңтүстік Арал өңіріне ұя салып, көктем мен күзде Әмудария, Зарафшан және Сырдария бассейндері арқылы ұшып өтеді. Негізгі қорегі балық еді, бірақ бұл жолы браконьерлердің кесірінен өздері «жемақыға» айналып кеткені өкінішті.

Өзбекстан заңнамасына сәйкес, Қызыл кітапқа енген жануарларды жойғаны үшін қатаң қылмыстық жауапкершілік қарастырылған. Енді экзотикалық асқа құмар «гурмандар» қомақты айыппұл арқалайды немесе бес жылға дейін темір тордың ар жағынан бір-ақ шығуы мүмкін. 16 мың долларлық бірқазан қуырдағы расымен де тамақтарынан қалай өткені таңғаларлық!