Қоршауларға есірткі сайттарының жарнамасын жазған тұрғын 3,5 жылға сотталды
Жетісу облысының тұрғыны есірткі таратуға қатысты тыйым салынған интернет-ресурстардың сілтемелерін граффити түрінде жазғаны үшін 3 жыл 6 айға бас бостандығынан айырылды.
Прокуратураның мәліметінше, ер адам есірткі бизнесін ұйымдастырушылармен келісіп, Балпық би ауылындағы қоршауларға, қақпаларға және электр желілерінің бағандарына интернет-сайттардың мекенжайларын жазған. Кейін жазбалардың фотосуреттері мен олардың орналасқан жерінің координаттарын кураторларына жіберіп отырған.
Көксу аудандық соты оны ҚР Қылмыстық кодексінің 299-1-бабы — есірткі құралдарын, психотроптық заттарды және олардың аналогтарын насихаттау немесе заңсыз жарнамалау бойынша кінәлі деп таныды.
Облыстық сот бірінші сатыдағы соттың үкімін өзгеріссіз қалдырды. Үкім заңды күшіне енді.
Пікірлер
Әзірге пікір жоқ. Алғашқы пікірді қалдырыңыз!
