Ескі көлігін тапсырған азаматқа жаңа көлік алуға жеңілдік берілуі мүмкін: экология минмистрілігі мәлімдеме жасады

Қазір Экология және табиғи ресурстар министрлігі кәдеге жарату төлемінің операторы – «Жасыл даму» компаниясымен бірге бағдарламаның тетіктерін пысықтап жатыр. Нақты талаптар, көліктерді қабылдайтын және қайта өңдейтін кәсіпорындар, сондай-ақ жеңілдіктің мөлшері әзірге белгілену үстінде.

Ескі көліктер мәселесі әлі де өзекті

Қазақстанның автокөлік паркіндегі көліктердің едәуір бөлігі ұзақ жылдардан бері пайдаланылып келеді. Қолда бар мәлімет бойынша, 20 жылдан асқан көліктердің саны шамамен 2,7 миллионға жетеді. Бұл елдегі барлық автокөліктің 44 пайыздан астамын құрайды.

Тағы төрттен бірінен астам көліктің жасы 10 бен 20 жылдың аралығында.

Сонымен бірге соңғы жылдары жаңа көліктердің үлесі де артып келеді. Қазір елде жеті жылға дейін пайдаланылған 1,5 миллионнан астам автокөлік бар.

Ескі көліктердің көп шоғырланған өңірлерінің қатарында Алматы облысы, Алматы қаласы, Жамбыл және Қарағанды облыстары аталады.

Негізгі мәселе – азаматқа тиімді жағдай жасау

Мамандардың пікірінше, ескі көлікті жай ғана есептен шығарып, кәдеге жаратуға жіберу автопаркті жаңартуға жеткілікті ынталандыру бола алмайды.

Көлік иесі үшін жаңа автокөлік сатып алу ескі машинаны жөндеп, әрі қарай пайдаланғаннан гөрі тиімді болуы қажет. Сондықтан жаңа бағдарламада нақты қаржылық қолдау тетіктерінің болуы маңызды.

Бұған дейін Қазақстанда осындай бағдарлама жұмыс істеген. Азаматтар ескі көлігін кәдеге жаратуға өткізіп, отандық көлік сатып алуға арналған жеңілдік сертификаттарын алған. Кейін сертификаттар қоры таусылып, бағдарлама тоқтатылған еді.

Енді оны қайта іске қосу арқылы ескі автокөліктерді кезең-кезеңімен айналымнан шығарып, олардың орнына қауіпсіздігі мен техникалық сипаттамалары жоғары жаңа көліктерді көбейту көзделіп отыр.

Сертификат қалай беріледі?

Жоспар бойынша, көлік иесі ескі автокөлігін арнайы қабылдау пунктіне өткізеді. Көлік одан әрі бөлшектеліп, жарамды материалдары қайта өңдеуге жіберіледі. Ал азаматқа жаңа автокөлік сатып алу кезінде пайдалануға болатын жеңілдік сертификаты беріледі.

Алайда сертификаттың нақты сомасы, қандай көліктер қабылданатыны, жаңа автокөлікті сатып алу талаптары және бағдарламаға кімдердің қатыса алатыны әзірге түпкілікті бекітілген жоқ.

Бұл талаптар анықталғаннан кейін ақпарат «Жасыл даму» компаниясының ресми ресурстарында жарияланады. Сондай-ақ ескі көліктерді қабылдайтын пункттердің тізімі де сол жерде орналастырылады.

Автопаркті жаңартуға мүмкіндік

Бағдарламаның қайта жандануы екі бағытта нәтиже беруі мүмкін. Біріншіден, ұзақ уақыт пайдаланылған көліктерді біртіндеп айналымнан шығаруға жол ашылады. Екіншіден, қазақстандық өндірістегі жаңа автокөліктерге сұранысты арттыруға мүмкіндік береді.

Дегенмен бағдарламаның нақты нәтижесі жеңілдіктің көлеміне және азамат үшін жаңа көлік алудың қаншалықты қолжетімді болатынына тікелей байланысты.

Қазір жоба әзірлену кезеңінде. Сондықтан көлік иелеріне бағдарламаның ресми түрде іске қосылғаны және қатысу шарттары жарияланғанға дейін нақты шешім қабылдамау маңызды.