Қазақстанның оңтүстігінде жер сілкінді

Қазақстанның оңтүстік өңірлерінде 27 маусым күні жер сілкінісі болды. Төтенше жағдайлар министрлігіне қарасты сейсмикалық станциялар желісі жерасты дүмпуін Астана уақытымен 18:34-те тіркеді.

Министрліктің ресми ақпаратына сүйенсек, дүмпудің қарқындылығы 2 баллды құраған. Жер сілкінісі Түркістан және Жамбыл облыстарының бірқатар елді мекендерінде сезілген.

Жер сілкінісі сезілген аймақтар:

• Түркістан облысы: Мырзакент, Жетісай, Абай ауылы, Сарыағаш, Шардара, Қазығұрт, Ленгер, Сайрам, Марткент, Ақсукент, Тұрар Рыскулов ауылы, Арыс, Темірлан, Шәуілдір, Шаян (Чаян).

• Жамбыл облысы: Бауыржан Момышұлы ауылы, Сарыкемер, Аса, Құлан, Қаратау, Мерке.

• Шымкент қаласы.

ТЖМ-нен маңызды ескерту: Жер сілкінісі кезіндегі 10 қадам

Төтенше жағдайлар министрлігі азаматтарға дүрбелеңге түспей, қауіпсіздік ережелерін сақтауды ескертеді:

1. Сабыр сақтаңыз: Дүрбелеңге жол бермеңіз.

2. Лифт пен баспалдақты ұмытыңыз: Дүмпу кезінде оларды пайдалану өте қауіпті.

3. Қауіпті заттардан алыс болыңыз: Терезе, люстра, ауыр жиһаздардан оқшауланыңыз.

4. Сенімді пана іздеңіз: Көпқабатты үйде болсаңыз, негізгі (капитальды) қабырғалардың бұрышына жасырыныңыз.

5. Ғимараттан шығыңыз: Көпқабатты үйлердегі тұрғындар дүмпу тоқтағаннан кейін ғана сыртқа шығуы тиіс.

6. Коммуникацияны өшіріңіз: Су, газ және электр желілерін ажыратыңыз.

7. "Дабыл шабаданын" алыңыз: Алдын ала дайындалған қажетті заттары бар сөмкені ұмытпаңыз.

8. Ашық алаңға шығыңыз: Электр желілерінен, ғимараттар мен ағаштардан алшақ тұрыңыз.

9. Сақ болыңыз: Қайталама дүмпулердің болуы мүмкін екенін ескеріңіз.

10. Көмектесіңіз: Қарт адамдарға және мүмкіндігі шектеулі жандарға қол ұшын созыңыз.

Естеріңізге сала кетейік, осы айдың басында Талдықорған мен Талғар қалаларында да жер сілкінісі тіркелген болатын. Тұрғындардан тек ресми ақпарат көздеріне сенуді сұраймыз.

Дереккөз: ҚР ТЖМ ресми Telegram-арнасы / Tengrinews.kz