Қазақстандық пара дзюдошылар әлемдік Гран-приде 6 медаль олжалады

Бразилияның Сан-Паулу қаласында зағип және нашар көретін спортшылар арасында өткен пара дзюдодан әлемдік Гран-при турнирінде Қазақстан құрамасы жарқын жеңіске жетті. Жерлестеріміз қоржынға 3 алтын және 3 күміс медаль салып, жалпыкомандалық есепте екінші орыннан көрінді.

Жарыс қожайындары – Бразилия құрамасы (6 алтын, 3 күміс, 4 қола) көш бастаса, үздік үштікті Украина (2 алтын, 1 күміс) түйіндеді.

Ел намысын қорғаған Ибрахим Нұрмаханұлы (J2, -70 келі), Бексұлтан Қалмұрза (J2, -81 келі) және Жұрқамырза Шүкірбеков (J2, +95 келі) қарсылас шақ келтірмей, турнир чемпионы атанды. Ал Альфия Тлекқабыл (J1, -52 келі), Аяла Мереке (J2, -70 келі) және Ерлан Өтепов (J2, +95 келі) күміс жүлдеге ие болды.

«Пара дзюдодан әлемдік Гран-при – Лос-Анджелес-2028 Паралимпиада ойындарына рейтингтік ұпай беретін маңызды жарыстардың бірі. Осы додадан кейін спортшыларымыз қыркүйек айында Грузияда өтетін әлем чемпионатында және қазан айында Жапониядағы Азия Пара ойындарында бақ сынайды. Онда да жоғары нәтижеге қол жеткіземіз деген үміттеміз», – деді пара дзюдодан бас жаттықтырушы Жандос Қиянов.

Айта кетейік, 10-11 шілде күндері өткен бәсекеде әлемнің 21 елінен келген 100-ден астам таңдаулы спортшы бақ сынады.