Қазақстандық пара атлеттер Тунистегі Гран-при турнирінен 4 медальмен оралды

Тунисте пара жеңіл атлетикадан өткен World Para Athletics Grand Prix халықаралық додасы қазақстандық спортшылар үшін табысты аяқталды. Әлемнің 58 елінен 500-ге жуық таңдаулы спортшы жиналған жаһандық жарыста ұлттық құрама қоржыны бір алтын, бір күміс және екі қола медальмен толықты.

Жарысқа Қазақстан атынан барлығы 18 спортшы қатысып, ел намысын қорғады. Олардың ішінен Еламан Жоламан шоқтығы биік нәтиже көрсетті. Ол F35 класы бойынша ядро лақтыру сайысында қарсыластарынан озып шығып, құрамаға алтын жүлдені сыйлады. Сондай-ақ, найза лақтырудан (F55) сынға түскен Мұқан Айтмырзаев күміс жүлдегер атанса, 400 метр қашықтыққа жүгіруде (T13) Қаржаубай Тінеев пен ядро лақтырудан (F42) Гүлдерай Кабурова жеңіс тұғырының үшінші сатысынан көрінді.

Спорт сарапшыларының бағалауынша, бұл Гран-при турнирінің салмағы өте зор. Себебі додаға тек әуесқойлар емес, Паралимпиада ойындарының жүлдегерлері, әлем чемпиондары мен рекордшылары қатысты. Пара жеңіл атлетикадан ұлттық құраманың бас жаттықтырушысы Тахир Мамашаев мұндай жоғары бәсекелестіктегі әрбір жеңістің маңызын ерекше атап өтті.

«Кілең мықтылар жиналған сыннан сүрінбей өтіп, жақсы нәтиже көрсету оңай емес. Бұл турнирде тіркелген көрсеткіштер тікелей әлемдік рейтингке әсер етеді. Оған қоса, алдағы Азия Пара ойындары мен Паралимпиадаға берілетін жолдамалар үшін іріктеу кезеңі болғандықтан, стратегиялық маңызы бар. Сондықтан мұндағы әрбір ұпай мен әрбір секунд біз үшін өте құнды», – деп түйіндеді бас бапкер.

Осылайша, қазақстандық пара атлеттер халықаралық аренадағы әлеуетін тағы бір мәрте дәлелдеп, алдағы ірі кешенді жарыстарға дайындықтарының мығым екенін көрсетті