Қазақстанда көлік нөмірлерінің дизайны өзгереді: ІІМ жаңа бұйрықты бекітті

ҚР Ішкі істер министрлігі мемлекеттік тіркеу нөмірі белгілерінің пішіні мен үлгілерін айқындайтын бұйрыққа өзгерістер енгізді.

Жаңашылдық екі бағытты — мемлекеттік нөмірлердің әріптік сериялары мен өңірлердің цифрлық кодтарын қамтиды.

Негізгі өзгерістер шетелдік үлесі бар заңды тұлғаларға, шетел азаматтарына және азаматтығы жоқ адамдарға тіркелген мототранспорт пен тіркеме иелеріне қатысты. Бұған дейін мұндай көлік құралдары үшін тек H және F әріптік сериялары қолданылып келсе, енді олардың тізімі алтыға дейін кеңейді: H, F, G, I, J және K.

Бұл жерде мототранспорт құралдарына арналған 3Д типіндегі, сондай-ақ тіркемелер мен жартылай тіркемелерге арналған 5Д және 5ДА типіндегі мемлекеттік тіркеу белгілері туралы сөз болып отыр. Барлық жағдайда бұрынғы екі серияның орнын алты серия басады.

Тізімнің кеңеюі тіркелген көлік құралдары санының артуына байланысты қолданыстағы әріптер мен цифрлар комбинациясының бірте-бірте таусылуымен түсіндіріледі.

Дегенмен, шетелдік компаниялар мен азаматтардың жеңіл және жүк көліктеріне бұл өзгерістердің қатысы жоқ — олар үшін F сериясы сол күйі сақталады. Жаңа әріптік сериялар тек мотоциклдерге, мотороллерлерге, тіркемелер мен жартылай тіркемелерге ғана енгізіліп отыр.

Тағы бір өзгеріс еліміздегі барлық көлік иелеріне қатысты. 2022 жылы Абай, Жетісу және Ұлытау облыстары құрылғаннан кейін оларға сәйкесінше 18, 19 және 20 кодтары берілген еді. Алайда ІІМ бұйрығының қосымшасында бұл нөмірлер бірнеше жыл бойы резервте тұрды және өңірлерге ресми түрде бекітілмеген болатын.

Енді бұл олқылықтың орны толды. Құжаттың жаңа редакциясында 18 коды – Абай облысына, 19 коды – Жетісуға, ал 20 коды – Ұлытау облысына тиесілі екені нақты көрсетілген.

Бұған қоса, ІІМ бұйрықтың терминологиясын жаңартты. Құжатты қолданыстағы заңнамаға сәйкестендіру мақсатында бұрын қолданылып келген "шетелдіктер" сөзі дәлірек — "шетел азаматтары" деген тіркеспен алмастырылды.

Бұйрықтың орындалуына жауапкершілік ішкі істер министрінің жетекшілік ететін орынбасарына жүктелді. Әкімшілік полиция комитеті құжаттың мемлекеттік тіркелуін және ресми жариялануын қамтамасыз етуі тиіс.