Қазақстан құрамасы Сурдлимпиадаға жолдама алды

Қазақстанның сурдо футзал құрамасы Бішкекте өткен Азия чемпионатында тарихи жеңіске жетіп, құрлықтың ең мықты командасы атанды. Есту қабілеті зақымданған спортшылар арасындағы бәсекеде жерлестеріміз алтыннан алқа тақса, күміс жүлде Сауд Арабиясына, ал қола медаль Өзбекстан құрамасына бұйырды.

Мүше мүмкіндігі шектеулі тұлғаларға арналған спорттық даярлау орталығының әдіскері Арман Әмреновтің айтуынша, еліміздің командасы өз тарихында тұңғыш рет Азия шыңына көтеріліп отыр. Айналмалы жүйемен өткен жарыстың топтық кезеңінде отандастарымыз Қырғызстан, Сауд Арабиясы, Оман және Өзбекстан командаларын сенімді түрде ұтып, ақтық сында Бахрейн спортшыларын 2:1 есебімен тізе бүктірді. Осы жарқын жеңістің нәтижесінде ұлттық құрама 2027 жылдың 15-24 қаңтары аралығында Австрияда өтетін ХХI қысқы Сурдлимпиада ойындарына жолдама алды. Сонымен қатар маусымның жиырма алтысы мен шілденің бесі аралығында жалғасқан құрлықтық додада ел абыройын асқақтатқан Ислам Құрбанов турнирдің «Үздік қақпашысы» атанып, арнайы марапатқа ие болды.